Кугу Отечественный сарыште сеҥымылан тений – 78 ий. Шочмо кундемыштына тыныс илышым аралаш манын, тушман ваштареш кредалаш Марий кундем гыч 131 тӱжем утла салтак каен. Тышечын пелыже наре еҥ сӧй пасуэш вуйжым пыштен але йомшылан шотлалтеш. Сеҥымашым лишемдаш полшышо ветеран-шамычат, тылыште тыршыше-влакат жап эртыме семын республикыштына шагалрак да шагалрак кодыт.
Йолташ-влак, тендан тукымыштыда але палымыда-влак кокла гыч сарыште кӧ лийын? Сар корным эртымыштым паледа мо? Ий еда эртаралтше «Курымашлык полк» акцийыш кузерак ушнеда?
Миральда ВОРОБЬЁВА, Морко район Зеленогорск школышто марий йылмым туныктышо:
– Мыйын кочам, Михаил Григорьевич Бекешев, 1941 ийыште сарыш каен. Тиддеч ончыч тудо Морко районысо Шордÿр школышто пашам ыштен, директор лийын.
Авам ойла ыле: «Мый ачам нерген пеш шагал палем, шарнем, пöртöнчык кÿзен, тупшо йоммешке, эре кидым рӱзен ужатенна. Тетла ачамым ужын омыл». Кочам Сталинград ола воктене кредалмаште вуйжым пыштен. Тÿрлö шарнымаш сайтлаште тудын нерген возымым кычалынам, нимом муын омыл.
Сандене 9 Май деч ончыч путёвко дене Волгоград олаш каем, ала иктаж-мом тушто пален налам.
А Сеҥымаш кечын шкенан посёлкысо шарныктыш воктене, шучко сöйыштö кредалше-влакым шарналтена. Кажне ийын пелашемын ачажын, Виктор Николаевич Воробьёвын, портретшым кидыштем кучем. Тудат Кугу Ачамланде сарыште лийын. Но, чаманен каласаш логалеш, шке кредалмашыж нерген каласкален кертын огыл, шинчавÿдшым веле ÿштылын. Тидын нерген пелашем чӱчкыдынак ойла.
Лилия СЕМЁНОВА, дирижёр, Марий Эл Кугыжаныш премийын лауреатше:
– Кажне ийын 9 Майыште еш дене кочам, Иван Данилович Даниловым, да ковам, Зинаида Сергеевна Даниловам, шарналтена да сеҥымашым лишемдаш полшымыштлан, тыныс илышым, канде кавам пӧлеклымыштлан таум ойлена!
Нунын шӱгар ӱмбакышкат кажне пайремлан миен толашак тыршена.
«Курымашлык полк» акцийыш онлайн йӧн дене икшывем-шамыч дене ушнаш шонена!
Софья ОСИПОВА-ШАРАБУЕВА, Озаҥ оласе 3-шо №-ан йоча сымыктыш школын туныктышыжо:
– Кочам, Иван Григорьевич Шарабуев, Кугу Ачамланде сарыште лийын. Сӧй пасушто куштылго огыл корным эртымыжым палена, чылажымат возен коденна. «Курымашлык полк» акцийыш ик гана Озаҥыште онлайн йӧн денат колтенам.
А.БАЙКОВА
