«Кушкын толшо эрге икшывын шинча ончылныжо лишыл еҥ пример семын лийшаш». Тыге шона Россий Армийын капитанже Артур Актимиров.
Башкортостан Республикын Шаран селаштыже шочын-кушшо марий рвезе элым аралышын профессийжым налаш 9-ше классыште тунеммыж годым шонаш тӱҥалын. Тиде жапыште кок изаже погонан лийын шуктен. Рвезат тӱҥалме еш йӱла деч кораҥын огыл, нунын дене тӧр шогымыжо шуын. Каникуллан да отпусклан толшо изашт-влак воктене лияш тыршен, койыш-шоктышыштым тӱткын эскерен, вашталтышым ужын, нунын тыматле, виян улмыштым палемден. Тыге шкенжымат военный илышлан ямдылаш тӱҥалын.
Военный вузлашке конкурс эре кугу. Рвезе тидым умылен. Артур школым медаль дене тунем пытараш уло вийжым пыштен. Тыршымыже арам лийын огыл. Сай аттестат да ший медаль Екатеринбург оласе военный артиллерийский командный училищыш тунемаш пураш корным почыныт. Икмыняр ий ончыч тиде училищым тукым изаже, капитан Дмитрий Михайлович Минлигулов тунем пытарен. Вузышто тунеммыж годым Артур морской пехотыш логалаш шонен. А тиде жапыште кокымшо изаже Анатолий Валерьевич Актимиров военно-морской институтым пытарен. Кызыт тудо Санкт-Петербургысо военно-морской институтышто пашам ышта, капитан-лейтенант.
Чылан палат, морской пехотыш эн вияным да чытышаным веле налыт, садлан Артур физподготовкылан шуко жапым ойырен, капкылжым шуарен. Тунеммаштат ик эн сай лийын: военный институтым шӧртньӧ медаль дене тунем пытарен. Шонымыжат шукталтын: корныжо морской пехотыш конден. Икмыняр ий Тихоокеанский флотышто службым эртен. Ынде кумшо ий Санкт-Петербург оласе Михайловский военный артиллерийский академийыште курсовой офицер-преподавательлан ышта.
— Шке ончылно эре у кӱкшытым шындыман да сеҥымашке шуаш тыршыман, ик верыште тошкештман огыл. Курсант-воспитанникем-влакланат «Мый кертам! Вием сита!» девиз дене илаш темлем, — манеш А.Актимиров.
Школышто физкультурым туныктышо Аркадий Баймурзинович ден медицина пашаеҥ Елена Султанбуратовна, мутат уке, чапле эргым куштен шогалтеныт. Чолга офицер землякышт дене Урсай да Мешер ял-влакат кугешнат. Артур деч таче пӱтынь Шаран вел марий самырык ӱдыр-рвезе-влак примерым налын кертыт.
Е.ГАЗИНА.
