26 апрельыште Йошкар-Олаште верланыше «Арена Марий Эл» манежыште мини-лапта дене Российын чемпионатше мучашлалтын. Ты гана тушто элнан 7 регионжо гыч 7 пӧръеҥ да 6 ӱдырамаш команде-влак вийыштым тергеныт.
™дырамаш команде-влак коклаште Марий Элын чапшым Провой кундем гыч сборный команде (тренерже – Г.Евдокимов) арален, 2-шо верым налын. Икымше – Пошкырт кундем гыч толшо команде, кумшо – Краснодар край гыч сборный. Пӧръеҥ команде-влак коклаште тыгай радам: икымше Оренбург область, кокымшо Тюмень область, кумшо – Ярослав область.
– Мыняр ий почела икымше верым налаш тыршена, но адакат кокымшо верыш лекна. Пошкырт кундем гыч толшо командылан сеҥалтна. Такшым шонымашнаже призёр радамыш логаш ыле. Тиде шукталте, а чемпион лӱмым иктаж вич ий налын огына керт. Мыйын шонымаште, ме психологически ямде онал. Адакшым командыштына самырык ешартыш шуко. Можыч, икой ок сите, вет моло дене таҥастарымаште ӱдырамаш команде-влак коклаште чылаштынат вийышт иктєр, – ойла командын капитанже Анастасия Максимова. – Тренировкымат эртаренна, ямдылалтынна. Икте куандара: тыгай кӱкшытан таҥасымаште опыт погына, мастарлык ешаралтеш. А верысе пӧръеҥ командым чылт уым чумырымо. Сандене нунылан тиде турнир кугу оптым погымо икымше лийын.
– Ты гана Марий Элын чапшым пӧръеҥ, тыгак ӱдырамаш командыжат Провой кундем гыч араленыт. Ӱдыр-влак кокымшо лийыч, а икымше верлан, мыйын шонымаште, командыште ийгот коклаште ойыртем кугу улмыжат, психологически кушкын шудымылыкат, спорт торжалык укелыкшат ситен огытыл, шонем. Тыгодым команде тырша, ӱдыр-влак молодец улыт, – мане тренерышт Георгий Евдокимов. – Россий кӱкшытан таҥасымашлан ик жап арняш куд гана ямдылалташ сайрак ыле, а ме кум гана тренироватлалтынна: ик гана спортзалыште, ик гана Звениговысо «Жемчужина» ФОК-ышто.
– Чылажат пеш сайын эртен. Мыланем «Арена» манеж пеш келшен. Тыште модашыжат куштылго. Порын, шокшын вашлиймыланда моткоч кугу тау, – мане Мишкан район гыч спорт мастер Вера Зайнашева (снимкыште).
Палаш: кок ий ончыч Йошкар-Олаште йоча команде-влак коклаште мини-лапта дене «Шӧртньӧ бите» всероссийский турнир эртен.
– Марий Элыште спортын сайын вияҥмыжым, тыгак чапле сооруженийлам шотыш налын, тиде вид дене тыште Российын чемпионатшым эртараш кутырен келшенна, – манын Российысе руш лапта Федерацийын вице-президентше С.Фокин. – «Арена» манежыште модаш сай йєным ыштыме. Сандене результатшат саемеш. Модмо пасу тӧр, вер йоҥгыдо.
Руш лапта – спортын национальный видше. Таче кечылан тудо элнан 70 регионыштыжо вияҥеш, ты вид дене 115 тӱжем еҥ пеҥгыде кылым куча. Руш лаптам всероссийский кеҥеж Универсиадын, Россий кӱкшытан ялысе кеҥеж да президент модмашын программышкыже пуртымо. Ты вид денат тўрлє разрядым, нормативым шукташ йӧн пуалтеш. Тений Марий Элын чапшым аралыше ӱдырамаш команде 1-ше верым налеш ыле гын, участник-влаклан спорт мастер лӱмым пуат ыле.
Е.ЭШКИНИНА
