26 июльышто Марий Элым вуйлатышын пашажым жаплан шуктышо Юрий Зайцев регионын шымше гана погымо Кугыжаныш Погынжын коло индешымше сессийыштыже участвоватлен.
Депутат-влак кум йодышым онченыт. Нунын кокла гыч икымшыже 2022 ийлан да 2023 ден 2024 ий-влакын плановый пагытыштлан республик бюджетыш вашталтышым пуртымо дене кылдалтын. Пеҥгыдемдыме у суммо дене келшышын, 2022 ийлан бюджетын тӱҥ показательже-влакым кугемдыме: доход ужашым – 4,38 миллиард теҥгелан, роскот ужашым – 7,96 миллиард теҥгелан, дефицитым – 3,59 миллиард теҥгелан.
Ешартыш оксам корным чоҥаш, олмыкташ да уэмдаш (2362,5 млн. теҥге), образований (520,7 млн. теҥге), тазалык аралтыш (502,4 млн. теҥге), граждан-влакым социально обслуживатлыме (106 млн. утла теҥге) системе-влаклан, физкультур ден спортым вияҥдаш (91,6 млн. теҥге), ялозанлыклан полшаш (45,4 млн. теҥге) да молылан ойыраш палемдыме. 2,5 миллиард утла теҥгем регионысо муниципальный образованийлашке социальный тӧнеж, гидротехнический сооружений-влакым олмыкташ да моло пашам шукташ финанс полыш семын колташ пунчалме. Тыгак Марий Элым да инфраструктур проект-шамычым социально-экономически вияҥдыме, граждан-шамычым аварийный илыме верла гыч кусарыме программе-влакын мероприятийыштлан оксам ешарыме.
Марий Эл правительствын резерв фондшо 100 миллион теҥгелан пойдаралтеш.
Федеральный бюджет гыч бюджет кредит-влакым кондымо дене коммерческий кредитым иземдыме да республик бюджетын дефицитшым тӧрлатыме.
2023 ден 2024 ий-влакын плановый пагытыштланат бюджетын тӱҥ параметрже-влакым кугемдыме.
Парламентарий законын проектше дене келшен. Марий Элым вуйлатышын пашажым жаплан шуктышо Ю.Зайцев депутат-шамычлан тауштен да кучем орган-влак ончылно шогышо задаче-шамычым икте-весе дене пайдалын мутланен шукташ, тыгак бюджетын социальный корныжым арален кодаш кӱлмым палемден.
Эше ик законын проектше налог ден сбор аланлаште кылым шотыш кондымо дене кылдалтын. Тудо простажак огыл политический да экономический ситуацийыште бизнеслан полшаш виктаралтын. Тылеч посна депутат-влак Марий Эл Республикын Молодёжный парламентше нерген положенийыш тӧрлатымаш-шамычым пуртеныт. Ынде парламентын йыжыҥъеҥжылан 14 гыч 35 ияш марте ийготан кажне гражданиным сайлаш лиеш.
Тиде кечын депутат-влак Марий Эл Республикын кок законжо ден Кугыжаныш Погынын куд пунчалжым пеҥгыдемденыт.
М.ИВАНОВА
