Марий Эл Кугыжаныш Погынын президиумжо регионын прокуроржо дене вашлийын.
Ты гана нуно подростко-влакын преступленийым ыштымышт нерген мутланеныт да ийготыш шудымо-шамычым, еш гыч лектын каен, перныл коштмо, тыгак законым пудыртымо деч аралыме мере-влак шотышто темлымашлам ыштеныт.
Прокурор Илдус Нафиковын палдарымыж почеш, Марий Элыште подростко-влак законым чӱчкыдынрак пудырташ тӱҥалыныт. Ийготыш шудымо-шамыч чӱчкыдынжӧ шолыштмышт да наркотикым шаркалымышт годым логалыт. Илдус Саидович тиде ситыдымашым еш-влак дене пашам чакрак ыштен тӧрлаташ темлен.
Кугыжаныш Погынын председательже Михаил Васютин подростко-влак коклаште преступленийын палынак шукеммыжлан, тыгак ийготыш шудымо-шамычым киберпреступностьыш чӱчкыдын ушымо случай-влаклан тӱткышым ойырен.
Прокурор-шамычын увертарымышт почеш, 2025 ийыште гына ийготыш шудымо-влакым, еш гыч лектын каен, перныл коштмо да преступленийым ыштыме деч аралыме пашам шуктышо орган-влакын 200 утла нарушенийыштым рашемдыме, 789 ача-авам икшывым шот дене ончыдымылан мут кучаш шогалтыме.
Республикыштына йоча-влакын йӱдым кугыеҥ-шамыч деч посна кошташ чарыме нерген йодмашым шуктымыштым тергат, алкоголян продукцийым ужалыман, интернет воткылыш ушнаш лийман заведенийлашке, каныме да кандарыме тӧнежлашке рейд дене лектыт.
Вашлиймаште ийготыш шудымо-влакым тыгай заведенийлашке пуртымылан оза-шамычым мут кучаш шогалтыме нерген тӧрлатымашым законодательствыш ешараш, подростко-влакым, еш гыч лектын каен, перныл коштмо деч аралыме шот дене еш-шамыч дене пашам вияҥдаш кӱлмым палемденыт.
* * *
Кугыжаныш Погынын председательже Михаил Васютин ден Молодёжный парламентын председательже Алексей Тришков ончыкыжым пырля шуктымо паша радамым лончыленыт.
Михаил Зиновьевич самырык парламентарий-влакын у составыштлан лишыл жапыште пашам виктарен колтымо чатка системым ышташ, законым лукмо пашашке ушнаш, муниципалитет-влак ден регионлан кӱлешан проект ден программе-шамычым ямдылаш тӱҥалаш каласен. Тыштыже нунылан кугурак коллегышт наставник семын полшышаш улыт. Поснак кугу тӱткышым самырык лидер-влакын профессиональный компетенцийыштым, политике сферыште моштымашыштым вияҥдымылан, самырык-шамычым лекше йодышым верлаште решатлаш туныктымылан ойыраш темлен.
Вашлиймаште Молодёжный парламентын кажне еҥжылан наставникым – Кугыжаныш Погынын депутатшым – палемдаш пунчалыныт. Тылеч посна элнан моло субъектлаж гыч самырык парламентарий-влак дене кылым кумдаҥдаш да пеҥгыдемдаш кутырен келшеныт. Мут толмашеш, Алексей Тришков июнь тӱҥалтыштак Пензышке, Юл кундем федерал округысо молодёжный парламент-влакын ассоциацийыштын заседанийышкыже, кая.
Алексей Тришков Молодёжный парламентын лишыл жапыште илышыш пурташ ямдылыме пашаже-влак денат палдарен, нунын кокла гыч иктыже – МОЛОДЙОШКА республик кӱкшытан молодёжный форумын кышкарыштыже эртараш палемдыме «Молодёжын йӱкшӧ» смене.
Вашлиймаште тыгак Марий Элысе Самырык законодатель-влакын советыштым – регионысо чыла самырык депутатым ик командыш ушышо органым – ышташ темлыме.
* * *
Кугыжаныш Погынын председательже Михаил Васютин Мер полыш штабыште граждан-влаклан приёмым эртарен.
Икымше йодыш Сидорово шӱгарлан верланымыж дене кылдалтын: тудо Йошкар-Ола але Медведево район кумдыкыш пура?
Парламент тиде йодыш дене икмыняр вере лектын. Пурышо вашмут-влак дене келшышын, Сидорово ял шотан илемысе да Медведево муниципал районысо депутат-влакын погынымашлашт Йошкар-Ола округын чекшым Сидорово шӱгарла шотышто вашталтен. Республикын Кугыжаныш пого министерствыже рӱдоласе администрацийлан палемдыме мланде участкым кугыжаныш кадастр учётыш шогалташ да нормативный документацийыш келшыше тӧрлатымашым пурташ темлен.
Марий парламентын вуйлатышыже тиде йодышым мучаш марте шуктымым шке эскераш тӱҥалеш.
Приёмышко тыгак самырык ава толын да Михаил Зиновьевич деч шочшыжлан, йочасадын выпускникшылан, кеҥеж пагытлан дежурный йочасадыште верым муаш полшаш йодын.
Йошкар-Оласе 7-ше №-ан йоча сымыктыш школ директорын алмаштышыже Михаил Васютин дене республикыштына йоча филармонийым але музыкальный иммерсивный театрым почмо нерген мутланаш толын.
Маргарита ИВАНОВА ямдылен
Марий Эл Кугыжаныш Погынын пресс-службыжын фотожо.
