Инфраструктурым вияҥдымым писемдыме шонымаш дене Марий Элыште 15 опорный илемым палемдыме.
Спискыш Йошкар-Ола, Медведево ола шотан посёлко да республикын 13 районжо пуреныт.
Ушештарена, РФ президент Владимир Путин Федеральный собранийлан посланийыштыже эл правительствылан кок тӱжем опорный населённый пунктым ойырен налаш да 200 мастер-планым ямдылаш кӱштен. Российыште региональный вияҥме шотышто правительственный комиссийын президиумжын заседанийыштыже регионлаште нине илем-влакым палемдымым, нуным ойырымо критерий-влакым каҥашеныт.
Вице-премьер Марат Хуснуллинын вуйлатымыж почеш эртаралтше совещанийыште Марий Эл вуйлатыше Юрий Зайцев ушнен. Тудо палемден: республикыште тыгай опорный населённый пункт-влак спискым ямдылыме, РФ Экономике вияҥмаш министерствыш колтымо.
Теве Медведево район пурен. Тушто 2030 ий мучаш марте вич кугу инвестиций проект шыҥдаралтшаш. Тиде «Семеновский» племзавод» ЗАО-н да «Шойбулакский» ПЗ ЗАО-н вольык ончымо комплексыштым чоҥымаш, прицеп ден полуприцепым, автоцистерным ыштен лукмаш, тыгак «Вудлэнд» турист проект. Финансированийын тӱрыс кугытшо – 6,7 миллиард теҥге утла. Нине проект-влак шукталтшыла республикысе бюджетыш окса шукырак пура, у паша вер-влак лектыт, районлаште инфраструктур вияҥеш.
Опорный населённый пункт «кушмо точкылан» шотлалтеш, тушто инфраструктур, образований, тазалык аралтыш, спорт да моло сфер-влак писынрак вияҥаш тӱҥалыт. Чыла тидыже еҥ-влакын илышыштым саемда, да турист йогыным шукемда.
Марий Эл Республикым вуйлатышын пресс-службыжын уверже негызеш
Л.СЕМЕНОВА ямдылен
Д.Речкинын фотожо
