Смотрицифру.рф сайтыште ынде телевизорын цифровой эфир телевиденийым кучаш ямде улмыжым тергаш лиеш. «Чылажат – приёмлан» («Всё для приёма») разделыште 121 производительын 26796 тӱрлӧ телевизорыштым вераҥдыме. Тышечын 8104 модельже цифровой стандартым куча. Разделыште тыгак тошто аналоговый телевизорлан келшыше 276 тӱрлӧ цифровой приставкым темлыме.
РТРС-ын генеральный директоржын сетьым виктарыме, кучылтмо да вияҥдыме шотышто икымше алмаштышыже Виктор Пинчукын палемдымыж почеш, цифровой эфир телевидений шотышто шокшо линийыш пурышо чумыр йодыш гыч 57 процентше приёмникым чын ойырен налме дене кылдалтын. РТРС-ын специалистше -влак телевизор ден цифровой приставке-шамыч шотышто тичмаш базым ыштеныт. Тудо поснак цифровой эфир телевиденийым кучышо у оборудованийым налаш тарваныше-влаклан пайдале. Аналоговый телевиденийым йӧртымӧ деч ончыч телевизорын цифровой стандартым кучымыжым тергаш кӱлешан.
Приёмникын цифровой стандартлан келшен толмыжым рашемдаш неле огыл. Тидланже смотрицифру.рф сайтын тӱҥ страницыж гыч «Чылажат – приёмлан» разделыш пурыман, вара «Кузе ойырен налаш?» («Как выбрать?») подразделыш кусныман да поискын корнышкыжо телевизорын модельжым возыман. Вес йӧн – келшыше модельым производительын алфавит почеш вераҥдыме переченьыштыже кычалман.
Модель цифровой стандартым ок кучо гын, тудлан DVB-Т2 стандартан приставке кӱлеш. Тыгай оборудованийын спискыжым тиде подразделыштак муаш лиеш.
Таче Российыште DVB-Т2 стандартым кучышо 2000 утла тӱрлӧ телеприёмникым ужалат. Эн шулдо телевизорын акше – 6000 теҥге. Кевытлаште да монь аналоговый телевизорлан келшыше 200 утла тӱрлӧ цифровой приставке уло. Нунын акышт 1000 теҥге гыч тӱҥалеш.
2019 ийыште Россий федеральный аналоговый телевидений дене чеверласа. Аналоговый передатчик-влак регионлаште 15 апрельыште да 3 июньышто пашам ыштымым чарнат.
М.ИВАНОВА.
