«МАРИЙ ЭЛ» ТАЧЕ

Чай, шере кочкыш да газет…

13 январь – савыктыме паша дене кылдалтше профессионал-влакын пайремышт, а тиде журналист, корреспондент, редактор, корректор, текстым погышо, а таче эше электрон изданийлан специалистше-влак улыт. 1703 ий 13 январьыште, Пётр кугыжан указше почеш, икымше «Ведомости» газет ош тӱням ужын. Тудын указше почешак тунам Санкт-Петербургышто ресторан-влакым почеденыт, тушко толшо еҥ-влак газетым лудын кертыш манын. Нуным эсогыл чай да шере кочкыш дене яра сийленыт. А газетыштыже кучемын лукмо указше, пунчаже-влак савыкталтыныт, вет кугыжа шуко у реформым илышыш шыҥдарен толын, умылтараш кӱлын. Тыгай мероприятийым Пётр кугыжа элнам вияҥдымаште моткоч кӱлешанлан шотлен. Варажым тыгай газет-влак моло кугу олаште лекташ тӱҥалыныт.

А таче кафеште але рестоаныште газетым кучен шичше еҥым от вашлий. Теве телефон але планшет дене шинчышым – пожалуйста. Калыклан уверым намиен шуктымо пашаштат пытартыш ийлаште у направлений-влак лектыт. Блогер, тиктокер-шамыч чолгалыкым ончыктат. Но тидын дене пырля газет ден журналым тошто йӧн дене (кеч тыге манашыжат ок лий, у технологий-влакан эҥерталтеш) ямдылен да савыктен лукмо паша садак вораҥеш. Мутат уке, нелырак у технологий-влак дене таҥасаш, туге гынат кагаз книгам, журналым, газетым лудшо-шамычат садак улыт. Сандене журналист пашаште калыклан уверым писынрак намиен шукташ манын, утларак интернет йӧн-влаклан эҥерташ логалеш. Соцкыл лаштыклам вияҥдаш, электрон подписчик-влак радамымат кугемдашак тыршена. А мемнан лудшына-влак – тиде тӱҥ щотышто ялыште илыше-влак улыт. Лач нунылан ме таче эҥертыш лияш тыршена.

Чыным каласаш гын, неле жапыште пашам ыштена. Уремыште шучко чер озалана. Туге гынат ме кунамже дистанционно, кунамже паша верыште, кунамже молгунамсе семынак калыкыш командировкыш, мероприятийыш лектын, шке пашанам шуктена, интервьюм налына, уверым погена. Икманаш, мемнан пашаштат черланен кертме лӱдыкшӧ уло. Санденжат коллективыште неле черым сеҥен лекше-влакын илыше кодмыштлан куанена. А кызыт чер дене кучедалше-шамычлан тазалыкым тыланена. Чыла тидым шотыш налынак, куанле ыле идалык мучаште сай уверым налаш: «Марий Эл» газетна Марий Эл Тӱвыра, савыктыш да калык паша шотышто министерствыжын эртарыме «Словом против Ковид» республиканский журналист конкурсыштыжо ойыртемалтын. Ковид чер нерген возымо, калыкым шижтарен, мо кӱлешым умылтарен шогымо шотышто «Эн сай творческий коллектив» семын палемдалтын.

Профессионал пайрем кечын моктенжак огыл гынат, шкенан нерген палдараш шотлан толеш, очыни. Йошкар-Олаште вес тыгай марий шӱлышан, чын марла мутланыше да тӱҥжӧ возышо коллектив укеат, очыни. Чылан гаяк ты пашалан тунем лектыныт да ынде ятыр ий шке шинчымашыштым, мастарлыкыштым ойырен налме корнышт дене шуарат. Вет редакций «Марий Эл» ден «Сурт-пече» да республикысе правительствын официальный документлажым савыктыше посна газет-влак дене пырля эше тӱрло кнгигам, календарьым луктеш.

Кажне пашаеҥже нерген шогалын каласкалаш лиеш. Кажныже ойыртемалтше, шке шонымашан. Опытанракше полыш кидым шуялташ кеч-кунамат ямде улыт. Кажныже шке пашаштыже могай-гынат сеҥымашыш шуын да шуэш. Тӱҥ шотышто чылан гаяк, вуз деч вара пашаш толын, тышанак кодыт. Моло вес пашаште шкеныштым огыт уж да. Южышт кучем органлаш пашаш куснат. Чаманен каласыман, пытартыш жапыште марла сайын возышо журналист-влак шагалын толыт. Эшежым редакцийыш толшыжо огыт кучалт. Газет паша куштылго огыл, мом ойлаш. Моткоч кугешнем «Марий Эл» газетыште ынде 27 ий пашам ыштымем дене, пырля ыштыше йолташ-влак дене. Пайрем вашеш Печать кече нерген возаш йӧным пуымо дене пайдаланен, чылаштымат профессионал пайрем дене саламлыме шуэш. Ончыкыжымат пашада ушныжо, таза лийза, лудшо-влакым утларак сай увер дене куандарыза.

Кажне ийын республикысе редакцийлаште тыршыше журналист-шамычлан «Марий Эл Республикын социально-экономический вияҥмашыж нерген эн сайын возымылан» республикысе правительствын премийжылан конкурс увертаралтеш. Пайрем кечын регион вуйлатыше Александр Евстифеев тудын лауреатше да тӱҥ редактор-влак дене Правительстве пӧртыштӧ вашлийын.  Шке саламлымаштыже тудо палемден, ий гыч ийыш журналист профессий обществылан ик эн кӱлешан семын кодеш. Тудо шке пашам сайын палымым, илышыште чолгалыкым, кумда тӱняшинчончалтышым, шонен, возен моштымо мастарлыкым йодеш. Лийше событий-влак нерген факт-влакым савыркалыде чын каласкалаш – тиде кугу ответственность, палемден тудо да журналист-влалан шке пашаштым сайын шуктымыштлан тауштен.

А правительстве премийын посна номинацийлаште лауреатше-влак тевыс кӧмыт лийыныт: ВГТРК-н «Марий Эл» ГТРК-жын тематический вещаний группыжын кугурак редакторжо Анна Лобанова, «Край Сернурский» да «Шернур вел» газет-влакын корреспондентше Алевтина Вшивцева,  «МЭТР» теле-радиокомпанийын ответственный редакторжо Марина Глушкова, «Кугарня» газетын корреспондентше Надежда Моисеева, «Йошкар-Ола» рекламе-увер агенствын авторский коллективше, «Марийская правда» газетын журналистше Наталья Кулишова. Эн сай журналист пашалан «Шӧртньӧ пера» чап лӱмым тений «Марий Эл» ГТРК-ан кореспондентше Вера Чистова сеҥен налын.

Кечывал деч вара Россий Журналист ушемын Марий Элысе пӧлкаже тыгак шке радамыштыже шогышо-влакым Марий кугыжаныш филармонийыш чумырен. Тушто палемдалтше-влак коклаште «Марий Эл» газетын журналистше-шамычат лийыныт.  Чаманен каласыман, пандемийлан кӧра тыгак Журналист ушемын, республикысе тӱрлӧ министерстве ден ведомствын  эртарыме конкурслаштыже сеҥыше да тӱҥ редактор-влак гына ӱжалтыныт.

Светлана Носова

М.Скобелевын фотожо

Снимкыште: «Марий Эл» газетын пашаеҥже-влак А.Абдулов, Л.Камалетдинова, Ю.Исаков, М.Иванова да А.Байкова.

Опубликовать в Одноклассники

Добавить комментарий