Эртыше арнян Провой кундемыш лектын кошташ пиал шыргыжале. Йöн дене пайдаланен, корнымбалне верланыше Яктерлÿвал ялыш Анна Скворцовалан ÿстембал висам да Кугу Шигак ялыш Галина Васильевалан (снимкыште) портативный газ плитам пуртен пуышна. Нине арверым ÿдырамаш-влак «Сурт-пече» ден «Марий Эл» газет-шамычлан 2022 ийын икымше пелийжылан возалтме квитанций дене модын налыныт.
Яктерлÿвал ден Кугу Шигак ял-шамыч Шолэҥер посёлко деч тораштыжак огыл верланеныт гынат, пытен толыт.
– Тыште шке жапыштыже 57 суртышто иленыт, кызыт латкумытыштыжо гына шогылтына. Шкеже Яктерлÿвалне шочынам. Школ деч вара Марпединститутыш каенам, марий йылме ден литературым, руш йылме ден литературым туныктышын специальностьшым налынам. Икымше ийын Волжский районысо Учимсола школышто туныктенам. Вара ачам илыш гыч кайыш, черле авам шкетын кодо. Пиалешем, Кугу Шигак школышто марий ден руш йылмым туныктышо Ярамарийыш кусныш, да мый шочмо кундемыш пöртыльым. Тунам школ моткоч кугу ыле, – ял да тышан верланыме амал дене палдарыш Галина Ивановна. – Кугу Шигак школышто 17 ий туныктышым. 1987 ийыште тудым петырышт, да мый Шолэҥерыш куснышым. Тусо школыштат 17 ий пашам ыштышым. Ынде 18 ий сулен налме канышыште улам. Йоча-влакым туныктымем годым «Марий Эл» ден «Марийская правда» газет-шамычым налынам, кызыт «Сурт-пече» ден «Местное время» изданий-влаклан возалтам.
Икте-весе коклаште кутырен келшыме почеш, почтальон газет-влакым Кугу Шигак мартежак огеш кондо, а Яктерлÿвалне илыше Анна Скворцовалан кода. Галина Ивановнаже вара тудын деке сурт сомылка деч каналтымыла але физзарядкым ыштымыла, яндар южым шÿлымыла миен толеш. Мут толмашеш, А Скворцова 77 ийыш тошкалын. Шке жапыштыже библиотекарьлан пашам ыштен. Мийымына годым телефон дене йыҥгыртымылан ыш вашеште, сандене, ала мöҥгыштыжö уке, иктаж-кушко каен манын, висам Г.Васильевалан кодышна. Тудыжо озанлыкыште кÿлешан арверым лишыл кечылаштак наҥгаен пуаш сöрыш.
– «Сурт-пече» газет чыла шотыштат келша. Эн ончычак «Тазалык» мужыр лаштыкым лудам, вара – «Сад-пакчазым», «Илыш йыжыҥым». Келшыше ой-каҥаш дене пайдаланашак тыршем. Мом ом умыло гын, газет редакцийышкыда йыҥгыртен рашемдем. Шарнеда, чукыр мутым умылтараш йодынам ыле? – порын шыргыжале 75 ияш Г.Васильева. – Пелашем мÿкшым онча, сандене мÿкшызылан пöлеклалтше лаштыкым кумылын лудеш… Газет моткоч пайдале, моткоч оҥай, сандене ме тудым огына кудалте, огына йÿлалте, а йоммо деч иктыш ургена.
Теве тыгай улыт газетнан Провой вел йолташыже-влак!
М.ИВАНОВА
Авторын фотожо
