Эртыше арня мучаште Йошкар-Олаште илыше да тышке унала толшо-влак беларусь артист-влакын мастарлыкыштым ончен да аклен кертыныт.
Российыште Беларусь тӱвыран кечыжлан пӧлеклалтше мероприятий Марий Элыште икымше гана эртен. Тиддеч посна артист-влак Москошто, Татарстаныште калыкым куандареныт.
Концерт тӱҥалмеке, зал тич погынышо калык кажне мурым, куштымашым шокшын вашлийын, шокшо кидсовыш дене тауштен. Беларусь Республик гыч Г.Цитович лӱмеш национальный академический калык хор, кугыжаныш академический куштышо ансамбль идалыкын жапше дене кылдалтше муро, куштымаш дене чынжымак кумылым налын моштеныт. Цимбалист-влак Елена Костицына ден Ольга Григоренкон дуэтышт семӱзгарым шоктымо мастарлыкышт дене чылт ӧрыктарыш. А теве Беларусь Республикын сулло артистше Виктория Алешко ден самырык мурызо Ксения Галецкаян сылнын муралтымышт чоныш куан тулым пуртышт. Концертым вӱдышын ойлымыж почеш, Ксения тӱнямбал кӱкшытыштӧ эртаралтше «Славянский базар в Витебске» йоча музыкальный конкурсын гран-прижым сеҥен налын.
Мутат уке, ты кастене концертыш погынышо калык кумдан чапланыше «Песняры» ансамбльын сценыш лекмыжым чон вургыж вучен. Пел курым утла ончыч музыкант Владимир Мулявинын чумырымо коллектившын репертуаржым залыште шинчыше-шамычат сайын паленыт да нунын дене пырля «Молодость моя, Беларусия», «Беловежская пуща» мурым муреныт.
Шагатат пеле шуйнышо гала-концерт ик шӱлыш дене эртен. Чынжымак, артист-шамычын мастарлыкыштлан уке мучаш! Ты кастене кажне ончышо театр гыч мӧҥгыжӧ кумыл нӧлтшӧ каен да белорус артист-влакым эше кужу жап шарнаш тӱҥалеш.
А ме ӱшанена: Марий Эл ден Беларусь республик-влакын артистышт-влак ончыкшымат икте-весе деке унала кошташ да шке мастарлыкышт дене калыкым куандараш тӱҥалыт.
Концерт деч вара келшымаш кылым ойпидыш дене пеҥгыдемдышт. Тушко кидпалым Беларусь кугыжаныш филармонийын генеральный директоржо Александр Никита ден А.Я.Эшпай лӱмеш Марий кугыжаныш филармонийын вуйлатышыже Андрей Пуртов пыштышт.
Алевтина БАЙКОВА.
Авторын да Е.Никифоровын фотошт.
