Таче Марий Элым вуйлатыше Юрий Зайцев Волжск оласе рӱдӧ больницыше азам ыштыме у отделенийым почын.
Идалыкыште 1,5 тӱжем ӱдырамашлан азам ышташ полшен кертше у отделенийым республикыштына кугыт шот дене кокымшо олаште чоҥымо.
Тыште Волжск олаште, Волжский, Морко да Звенигово районлаште илыше 30 тӱжем утла ӱдырамашлан медицине полышым пуаш йӧным ыштыме. Тымарте мӱшкыран ӱдырамаш-шамычлан 100 утла километр тораште верланыше Йошкар-Олашке кудалышташышт логалын.
Азам ыштыме отделенийым республикнам социально-экономически вияҥдыме индивидуальный программын кышкарыштыже чоҥымо да технике ден шыҥдарыме. У объект 500 миллион утла теҥгеш шуын.
Кум пачашан у зданийым тошто корпус дене кокымшо пачашысе вончак дене ушымо. Тыште приёмный покой, азам да операцийым ыштыме блок, азам ыштыме деч варасе обсервационный да физиологический, ӱдырамаш ден аза-влаклан реанимаций да интенсивный терапий, мӱшкыран-влакын патологийышт отделений-влак, изолятор, административно-хозяйственный блок верланеныт. Волжск оласе рӱдӧ больницын тӱҥ врачше Дмитрий Фризинын каласкалымыж почеш, азам ыштыме отделенийыш кызытсе медицине оборудованийым: ультрайӱк дене шымлыме, шодым искусственно вентилироватлыме аппарат-шамычым, азалан интенсивный терапийым эртарыме инкубаторым – шындыме.
Марий Элым вуйлатыше республикысе калыкым кужун вучымо да кӱлешан эше ик объектым почмо дене саламлен.
– Ӱшанем, азам ыштыме отделений медицине полышым пуымо качествым саемдаш, Марий Элыште йоча шочмо чотым кугемдаш полша. У роддомышто пациент-влакланат, изи чукай-шамычланат, персоналланат чыла шотыштат йӧнан лиеш, – медицине тӧнежым ончен савырнымыж годым манын Ю.Зайцев.
А эше Юрий Викторович тыште акушер-гинеколог, неонатолог, реаниматолог да моло специалист-влакын профессионал коллективышт пашам ыштымым палемден.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
