СПОРТ ТАЗАЛЫК Чолгалык

Артист огытыл, но куштат, мурат

Артист огытыл, но куштат, мурат
Тунемше-влакын кеҥеж каникул тӱҥалын. А спортсмен-шамычын – шокшо тургым. Я ик вид дене, я весе дене тӱрлӧ кундемлаште тӱрлӧ кӱкшытан таҥасымаш-влак эртаралтыт. Регионысо ӱдыр-рвезе-влакат сай результат дене ойыртемалтыт, сеҥышыш лектыт. Тыгодым иктым палемдыман: кеч-могай спортсмен тӱҥалтыш негызым школышто пышта. Тыгодым вий-куатыштым, мастарлыкыштым республик кӱкшытыштӧ ончыкташ тӱрлӧ йӧным ыштат. Мутлан, идалык мучаште президент модмаш ден президент состязаний… Чаманен каласыман, состязанийышкыже ончыч командыште вич ӱдыр ден вич рвезе лийыныт гын, тений – кум ӱдыр ден кум рвезе.
Спорт многоборье деч посна кажне команде творческий конкурс ден теорийыште таҥасен. Мутат уке, йоча-влак деч посна вуйлатышышт, физкультурым туныктышышт, моткоч тургыжланеныт.
– Тидын деч посна огешат лий. Южгунамже иктаж таҥасымаш деч ончыч йӱдымат от мале. Теве ты гана президент таҥасымаш деч ончыч лач йӱдым у шонымаш тольо, творческий конкурсышто ик ужашым вашталташ йӧн лекте. Лудышмурым мурымекышт, ӱдыр-влаклан сарафаным чиеныт, – мане конкурс деч ончыч ӱдыр-рвезе-влаклан ала-мом пеш умылтрыме деч вара Кужеҥер район Йӱледӱр кыдалаш школышто физкультур ден ОБЖ-ым туныктышо Юрий Авипов. – Такшым меже артист огынал. Вес туныктышо полша гын, сайрак ыле… Ты гана спорт многоборьеште нылымше верыш лекна, а ӱмаште призёр радамыште лийынна. такшым ӱдыр-рвезе-влак тыршеныт. Вика Антропова кокымшо верыш лекте. Молодец. Икте куандара: республик кӱкшытан мероприятийлаште ӱдыр-рвезе-влак моло кундемысе школласе тунемше-шамыч дене вашлийыт, кутырат, йолташым муыт, икте-весе деч могай-гынат опытым налыт, а тидыже эн тӱҥ, шонем. А тыгай шкешотан оҥай спорт мероприятийыш ушнаш йӧным ыштымыштлан организатор-влаклан тау.
Юрий Селифонович – РФ Образованийын почётан пашаеҥже, пашан ветеранже. Тудо 44 ий школышто тырша. Эреак йоча-влак коклаште. Шке манмыжла, вес пашаште шкенжым огеш уж. Тек ончыкшымат сай результатым ончыктат, воспитанникше-влак таза кушкыт, сай результатым ончыктат. Чылаштлан творческий шӱлышым тыланена.
Е.Эшкинина.

Опубликовать в Одноклассники

Добавить комментарий