22 январьыште Марий Элым вуйлатыше Александр Евстифеев Параньга районысо Ондропсола ялыште кызытсе жаплан келшыше у фельдшер-акушер пунктым торжественно почын да Параньга посёлкышто уэмдыме обелискым ончен.
Ондропсола кундемыште илыше калык у ФАП-ын пашам ышташ тӱҥалмыжым изин-кугун вучен. Тушто квалифицироватлыме медицине полышым Ондропсола, Лебляк да Ермучаш яллаште илыше 600 утла еҥ налаш тӱҥалеш. Зданийыште персоналын, фельдшер-акушерын кабинетышт, процедурный кабинет, медикаментым аралыме клат, озанлыкыште пайдаланыме ӱзгар ден арверым кучымо пӧлем, санузел, теплогенераторный улыт. У объектым чоҥашлан 7,8 млн. теҥгем кучылтмо, тышечын 1,6 млн. утла теҥгежым Марий Элын бюджетше гыч ойырымо.
Параньга район администрацийым вуйлатыше Альфит Ибраевын мутшо гыч, 82,5 кв. м кумдыкан ФАП-ым кок тылзе дечат кӱчык жапыште чоҥымо.
Йошкар лентым торжественно пӱчмыж деч вара республикым вуйлатыше зданийым ончен савырнен да тушто шокшо, медикамент ден кӱлешан оборудованийын ситышын улмыштым палемден. Республикыштына фельдшер-акушер пункт-влакым чоҥымо да пойдарыме паша чолган шукталтеш, ешарен тудо.
Республикым вуйлатыше тыгак Параньга посёлкышто лийын. Тушто верысе калыкын тӱҥалтышыж почеш уэмден олмыктымо обелискым ончен.
А.Ибраевын каласкалымыж почеш, Кугу Отечественный сарыште вуйым пыштыше-влакым шарныме лӱмеш обелиск калыкын поснак пагалыме вержылан шотлалтеш, вет Параньга район гыч фронтыш 7,8 тӱжем еҥ каен гын, 4 тӱжем нарыже мӧҥгӧ пӧртылын огыл. Сандене 50 ий утла шогышо шарныктышым уэмден олмыкташ пунчалме. Тыгак 2020 ийыште республикысе ола ден район-влак коклаште эртыше «Павших героев будем достойны» конкурсышто Параньга район 100 тӱжем теҥге кугыт грантым сеҥен налын. Тиде окса дене политический репрессийын жертвыже-влаклан шарныктышым шогалтыме, молан манаш гын кундемыште илыше 554 еҥым репрессироватлыме, 102 еҥым лӱен пуштмо.
Марий Элым вуйлатыше районышто шукталтше патриот пашам кӱкшын аклен.
«Верысе тӱҥалтышлан полшымо проект моткоч кӱлешан. Кумдыкым республикын да муниципалитетын бюджетышт гыч ойырымо окса, тыгак верысе бизнес ден посна граждан-шамычын полшымышт дене тӱзатыме. Тидыже – патриот воспитанийыш пыштыме кугу надыр. Чылажымат сайын ыштыме. Тышке чон ден средствам пыштыше-влаклан кажныжлан тауштена», — манын А.Евстифеев.
Мучаште республикым вуйлатыше верысе тӱҥалтышлан полшымо программылан поснак кугу тӱткышым ойыраш кӱлмӧ нерген ушештарен.
Марий Элын организаций да
аналитике виктемжын увернже негызеш
М.ИВАНОВА ямдылен
