Шукерте огыл Йошкар-Олаште Марий Мер Каҥашын эртарыме Марий форумын шошымсо сессийышкыже Моско ола гыч моткоч чолга да виян марий Иван Мечишев толын коштын.
Урал кундемыште шочын-кушшо пӧръеҥ 38 ияш веле гынат, изи огыл кӱкшытыш шуын. Таче тудо «Сильная Россия» общероссийский толкынын Кӱшыл Советшын членже, «Офицеры России» общероссийский организацийын Патриотический воспитаний шотышто советшын вуйлатышыжын алмаштышыже, «Сильнейшая нация» общероссийский спортивно-богатырский толкынын вуйвержын еҥже, «Российысе стронгмен-влакын федерацийышт» организацийын исполнительный директоржо, Российысе суд пристав-влакын федерал службыжын мер советшын еҥже. А такшым тудо пауэрлифтинг дене спорт мастерыш кандидатше, но кызыт спорт карьерым мучашлен да персональный тренер семын ышта. Мер илышыште чолгалыкшылан ӧраш гына кодеш: паша дене тудо эл мучко моткоч шуко кудалыштеш…
Шке жапыштыже спецвойскаште служитлымыжат тидлан полша. Таче тудо самырык тукымым шочмо элым йӧратыме шӱлышеш шуарен, туныктен, чын корныш шогалтыме пашалан кугу верым ойыра. Йошкар-Олаште лиймыж годым тидлан кӧра лӱмын кучалтын да икмыняр школышто тунемше-влак дене вашлиймашым эртарен. Мый тудын дене пырля 3-шо №-ан школышто лийынам. Икшыве-влак дене мутланыме койышыжымак палемдыман: нуным ылыжтен, шкенжым колышташ да умылаш таратен кертмыжлан ӧрымат. Тыгай вашлиймашым эртарыме проектым тудо лӱмын ямдылен. Илышыште шке верым муаш, чын шуараш, ава-ачам, кова-кочам, шочмо верым, элым йӧраташ, шеме ден ошым ойырен мошташ туныкта. Айдемын кӧргӧ да тазалык куатшым кушташ да тудым илышыште кучылт мошташ кӱлмӧ нерген ойла. Шке примерже дене пеҥгыдемда. А куатше тудын чынжымак ӧрыктарен кертше. Таклан огыл шке жапыштыже Юл эҥер дене баржымат ик вер гыч весыш шке вийже денак шупшын каен.
Иван ӱдыр-рвезе-шамычлан вийым тергыме конкурс-влакымат эртарен, гитарым шоктен, мурен. «Тыгай вашлиймаш-влак самырык тукымлан моткоч кӱлешан да пайдале улыт», – ойла шкеже. Таклан огыл вашлиймаш пытмеке тудын дене пырля войзалташ шонышо тунемше-влак шукын лийыныт.
С.Носова
Снимкыште: Иван Мечишев – вашлиймаш годым.
