Пеледыш пайремыште республикысе ялозанлыкыште тыршыше да ойыртемалтше еҥ-влакым тӱрлӧ семын палемденыт.
Эн ончыч Марий Эл вуйлатыше Юрий Зайцев ты йӱлам шуктен.
«Марий Эл ялозанлыкын сулло пашаеҥже» чаплӱмым «Семёновский» племзаводышто машина дене ушкалым лӱштышӧ Галина Лаптева налын.
Марий Эл правительствын Чап грамотшым «Шойбулакский» племзаводын тракторист-машинистше Андрей Лебедевлан, Параньга районысо «Победа» кооперативын инженерже Людмила Петровалан, тыгак Марий Эл вуйлатышын Тауштымашыжым Волжский округысо «Москва» предприятийын машина дене ушкалым лӱштышӧ Любовь Савиновалан да Курыкмарий округысо «Акпарс» агрофирмын ветеринарже Иван Смирновлан кучыктеныт.
Республикысе Ялозанлык да кочкыш сату министерствын «Агромотиватор» грантшым Килемар округ гыч Алексей Астафьев да Курыкмарий район гыч Андрей Львов сеҥен налыныт. Тудым СВО участник да ветеран-влаклан кучыктат. Алексей ешыж дене сценыш лектын гын, Андрейын кызыт реабилитацийыште улмыжлан кӧра – шӱжарже.
Агропромышленный комплексым вияҥдымашке кугу надырым пыштыше кум еҥым Марий Эл Кугыжаныш Погынын Тауштымашыж дене республикысе законодательный собранийын председательже Михаил Васютин палемден.
Икмыняр ойыртемалтше озанлык ден пашаеҥ-влакым ялозанлык да кочкыш сату министр Павел Раевский саламлен. Тений ага пашам жапыштыже эртарен колтымылан министерствын Тауштымашыжым да сеҥышын кубокшым Шернур муниципал округ сеҥен налын. Кокымшо ден кумшо верла Медведево ден Марий Турек район-влакын лийыныт.
Эн сай ялозанлык сатум ыштен лукмыштлан Марий Турек район гыч «Колос», «Марий Купто» да Курыкмарий район гыч «Бабушкин» ООО-влак сеҥыше семын палемдалтыныт.
Эн сай механизаторлан У Торъял район «Первый Май» колхоз гыч Виталий Еруслановым, «Семеновский» племзавод гыч Владимир Кудряшовым да «Шойбулакский» племзавод гыч Григорий Охотниковым шотленыт.
Михаил Скобелевын фотожо
