Элна мучко илыше марий-влак шке йӱлаштым огыт мондо, ага пашам иктешлыше пайремым эртарат.
Пеледыш пайрем-влак тылеч ончыч Ленинград областьысе Всеволжск олаште, Татарстанысе Менделеевский районышто, Виче вел Пижанью район Вӱлеҥерыште (Марий Ошай) гӱжленыт. Виче марий-шамычым областьысе Марий тӱвыра рӱдер ушен. Пайремым Уржум, Яраҥ, Кикнур, Кильмезь, Уржум районла, тыгак Марий Эл гыч усталык коллектив-влак сӧрастареныт. Киров оласе Калык-влакын келшымаш пӧртыштын еҥышт, тыгак Кировысо тӱвыра колледж гыч «Вятка» куштышо да мурышо ансамбль миеныт. Мероприятийым эртарыме площадьым районла гыч толшо-влакын марий кудышт сӧрастареныт.
А теве Виче кундем Уржум район Поса ялыште Йоча пеледыш пайремымат эртареныт. Тушко тыгак икмыняр район гыч йоча усталык коллектив-влак миеныт.
Кодшо каныш кечылаште Москвасе Пресненский паркыште марий шӱлыш озаланен. Тусо марий-влакын пайрем кумылыштым нӧлташ Марий Эл да Пошкырт Республикла, Киров область, Санкт-Петербург гыч мийыше артист, усталык коллектив да уна-влак полшеныт. Калык вургем, кочкыш конкурс, тыгак спорт таҥасымаш-влак эртеныт. Икшыве-шамыч мастер-класслаш да тӱрлӧ модышыш ушнен кертыныт, кидпаша ярмиҥга ыштен.
Пайрем калыкым Марий Эл вуйлатыше Юрий Зайцев лӱм дене правительстве председательын алмаштышыже – тӱвыра, печать да калык-влакын пашашт шотышто министр Константин Иванов саламлен.
21 июньышто Пеледыш пайрем икымше гана Ижевск олаште лиеш.
20 июньышто Урал марий-влак тудым эртараш Екатеринбург оласе «Радуга паркыш» погынат. Арти, Ачит, Красонуфимск районла гычат марий-шамыч мийышаш улыт. Тидын нерген Урал марий-влакын калыкле-тӱвыра автономийыштым вуйлтыше Наталья Ябекова увертара.
Светлана Носова ямдылен.
Снимкыште: Москошто эртыше Пеледыш пайрем годым.
Моско землячествын воткыл лаштыкше гыч налме фото.
