Марий Элыште «Отец Героя» фотопроект тӱҥалын.

Тиде – Марий Эл вуйлатыше Юрий Зайцевын полшымыж дене «Защитники Отечества» фондын регионысо филиалжын темлымыж почеш илышыш пуртымо «Эстафета Победителей» кумда проектын этапше.

Икымше фотосессий кодшо кечылаште «Герои Отечества» музейно-патриотический рӱдерыште эртен. Тушко специальный военный операцийыште вуйыштым пыштыше-влакын ачашт ушненыт. Фотографийлаште ача-влак кидыштышт эргыштын картычкыштым, кительыштым, наградыштым кученыт.

Лу ача кокла гыч иктыже – Шернур район гыч Сергей Шучин. Павел эргыжын позывнойжо «Щука» лийын. Ача ден эрге пытартыш гана 2022 ий 23 мартыште мутланеныт. Тулеч вара кыл кӱрылтын. Эргыжын увер деч посна йомын кертмыжлан Сергей Петрович ӱшанен огыл. Ила манын, шочшыжым кычалаш каен. Тудо ятыр километрым эртен, Павелын служитлыме верыштыжат лийын, но икшывыжым муын огыл. Умбакыжат кычалаш йӧн шукырак лийже манын, 2022 ий кеҥежым передовойыш доброволец семын каен. Да эргыжым август тӱҥалтыште муын. Рашемын: Павелын илышыже 2022 ий 25 мартыште кӱрылтын. Тылеч вара ачаже эргыжын позывнойжым налын да тудын служитлыме танковый батальонышто службым эрташ тӱҥалын.

«Кажне фотографийыште лишыл еҥым йомдарымаш да тыгодымак пытартыш шӱлыш марте Шочмо эл верч кредалше эргышт дене кугу кугешнымаш шижалтыт. Нуно тачысе кечын Геройжо улыт», – палемден Марий Эл вуйлашыте Юрий Зайцев шке телеграм-каналыштыже.

Эше ик фотографийыште – Морко район гыч Анатолий Петров. Тудын эргыже, гвардийын старший лейтенантше Дмитрий Петров, специальный военный операций кайыме кундемыште икымше кече гычак лийын. Ачажын каласкалымыж почеш, 2022 ий 26 мартыште тудын подразделенийжылан чодыра лоҥгаште кӱкшакаште тушман ваштареш шогашышт логалын, но шагалын лиймыштлан кӧра вуйыштым пыштеныт.

Дмитрий Петров увер деч посна йомшылан шотлалтын. 8 июньышто ача-аваже пален налыныт: эргышт 2022 ий 26 мартыштак колен. Тудым Мужество орден дене наградитленыт.

Т.Евсеев лӱмеш национальный тоштерын вуйлатышыже Светлана Зверева «Отец Героя» проектын фотосессийже арам огыл «Герои Отечества» рӱдерыште эрта, ты вер мемнан элнам аралыше-влакым шарныме да пагалымашым ончыктымо символышкыжо савырнен манын палемден.

Любовь Камалетдинова

Алевтина Байкован фотожо