Тыгай лӱман республик кӱкшытан конкурсым 30 ноябрьыште Йошкар-Олаште республикысе Марий тӱвыра рӱдер эртарыш.
Конкурсыш Йошкар-Ола, Кужэҥер, Медведево, Морко посёлкыла, У Торъял, Звенигово, Морко районла гыч чылаже 10 еш ушнен. Нуно эн ончычак шкешт нерген «Визитный картычке» конкурсышто каласкалышт. Тидлан чыланат видеопрезентаций гоч ешышт дене палдарышт. Тудым ончен, кажныштын гаяк чолга, чулым, усталык шӱлышан улмыштым, тӱрлӧ мероприятийыш ушнымыштым, кидпашам ышташ йӧратымыштым ужна.
Умбакыже йоча-влак ача-аваштлан творческий номерым ончыктышт. Тыште икшыве-шамыч почеламутым лудыч, мурым мурышт, кушталтышт, баянымат шоктышт. Тиде веле мо? Ятмановмытын эргышт-влак Артем ден Матвей эсогыл рэпым ойлышт да ӱлыл брейкым ончыктышт! Кузе нуно, изи падыраш-шамыч, ойыртемалтшын койыч!
А кумшо конкурс ача-ава-влаклан эртаралте. Нуно тӱҥалтыште заданий-влакым «шупшын луктыч», а вара тушто мом возымым шуктышт. Тыге ик ешлан, Морко район гыч Ивановмыт-Изотовмытлан, йочалан йокрок ынже лий манын, тудым модыкташ кӱлын. Но самырык ава, Алена Валерьевна, шкенжын шочшыжо-шамычым гына ыш модыкто, а мероприятийыш толшо кажне икшывым лекташ ӱжӧ да, нуным йыр шогалтен, «Име ден шӱртӧ» модыш дене модыктыш. У Торъял район гыч Садовинмыт еш, чынракше ава Екатерина Филипповна, шортшо йочам лыпландараш малтыме мурым муралтыш. Медведево поселко гыч Ятмановмыт, Звенигово район гыч Толстовмыт еш-влакат, рашрак ойлаш гын, ава-влак, азам малтыме мурым муралтышт. Йошкар-Ола гыч Некрасовмыт ден Морко поселко гыч Цветниковмыт еш-влак йомакым лудыч. Йошкар-Ола гыч Захаровмыт да Медведево поселко гыч Яковлевмыт еш йоча огеш коч гын, кузе тудым пукшаш лийме дене палдарышт. Тидлан нуно йомакым каласкалыман, почеламутым лудман, мурым муралтыман манын ойлышт да тидымак ава-влак ыштен ончыктышт. Морко район гыч Петровмыт ешат, икшывышт мален колтыжо манын, йомакым лудыч. А Кужэҥер поселко гыч Петуховмыт еш шортшо йочам кевыт гыч кузе шортмыжым чарен лукташ лиймым оҥайын модын ончыктышт.
Тиде конкурсышто икымше, кокымшо да кумшо верлашке лекше-влакым ойырен ышт нал, а кажне ешым посна номинаций дене палемдышт. Нуным республикысе тӱвыра, печать да калык-влакын пашашт шотышто министрын алмаштышыже Игорь Садовин саламлаш толын ыле. Поро мутым да тыланымашым ойлымеке, тудо еш-влаклан республикысе Марий тӱвыра рӱдер деч дипломым да пӧлекым кучыктыш. Тыге «Эн сай еш» лӱм дене Петуховмыт еш палемдалте. А моло номинаций теве могай ыле да теве кӧмытлан нуным кучыктышт: «Шкешотан еш» – Цветниковмыт еш; «Сымыктышым йӧратыше еш» – Петровмыт; «Пеҥгыде еш» – Садовинмыт; «Эн устан модшо еш» – Ятмановмыт; «Йӱлам аралыше еш» – Ивановмыт-Изотовмыт; «Эн келшыше еш» – Некрасовмыт; «Вуйын шогышо (ответственный) еш» – Захаровмыт; «Эн чолга еш» – Толстовмыт; «Эн поро кумылан еш» – Яковлевмыт.
Пытартышлан Петуховмыт ешын икшывыже-влак Кирилл ден Тимофей изирак «пӧлекым» ыштышт. Нуно баян дене сылне сем-влакым шоктышт. А эн мучаште чылан пырля тӱшка фотошко войзалтыч.
Тыгай конкурсын кӱлешлыкше моткоч кугу, вет тудо еш-влакым ушаш да эшеат пеҥгыдыракым, икояным ышташ полша.
Любовь Камалетдинова
М.Скобелевын фотожо
