УВЕР ЙОГЫН

Акций: Тыныс илышым пӧлеклыше-влаклан таушто

Сеҥымаш кече вашеш Марий Элысе ола ден районлаште Кугу Отечественный сарын ветеранже-влаклан полшымо шот дене оксам погымо акций тӱҥалын. Тыныс илышым пӧлеклыше-влаклан таушташ шонен, тушко ий еда тӱжем дене еҥ ушна.  

Таче республикыштына Кугу Отечественный сарын 302 инвалидше ден участникше, сӧй мландеш вуйым пыштыше да тыныс жапыште илыш гыч кайыше инвалид ден участникше-шамычын 1715 тулык ватышт, «Жителю блокадного Ленинграда» знак дене палемдалтше 22 гражданин, концлагерьын ийготыш шудымо ончычсо 46 узникше, действующий огыл армийын составышкыже пурыдымо военный частьлаште, тӧнежлаште, военно-учебный заведенийлаште 1941 ий 22 июнь гыч 1945 ий 3 сентябрь марте военный службым эртыше 29 военнослужащий да тылын 5651 труженикше улыт. Нуным кугыжаныш тӱткыш деч посна коден огыл гынат, кажныжлан ешартыш полыш кӱлеш, поснак – шкет илыше-шамычлан.  

Акцийыш чыла еҥ, предприятий, организаций ушнен кертыт. Оксам погымо счётым илыме кундемысе Калыкым социально обслуживатлыме комплексный рӱдерыште рашемдаш лиеш.

М.ИВАНОВА. 

Опубликовать в Одноклассники

Добавить комментарий