Тений Йошкар-Олаште эртыше Ӱярня пайремыште марий вургемым чийыше тиде самырык ава ден изи ӱдырым шукын ужын ӧрыныт, очыни. Изи Варян пайрем символыш савырнымыж нергенат мероприятийым вӱдышо-влак ойлышт. Аваже Лариса Григорьева пелен марла вычыматен коштшо Варям ужын, куан кумыл нӧлтын. Чынжымак, лач тыге ме шкенан марий койышнам, вургемнам, йылмынам арален коден кертына: тиде ешыште гай марла мутланен, марий вургемым чиен, чыла кӱлеш йӱлам шуктен.
Лариса Григорьева Параньга районысо Олор ялыште шочын-кушкын. Илыш пелашыже, Василий, Морко районысо Шлань ял гыч. Ынде нуно 21 ий наре ваш йӧратен, икте-весым умылен, Йошкар-Олаште илат. Ныл шочышым ончен куштеныт. Кум кугуракше эрге улыт. Эн кугуракше армийыште службым эрта, кокымышыжо аграрный колледжыште, кумшыжо кумшо классыште тунемыт. Кумытынат марла мутланат, молан манаш гын ешыштак тыге туныктат: школышто — рушла, но суртыш толмеке, марла гына ойла. «Изи ӱдырна моткоч вучымо шочшо лийын», — ойла Лариса. Санденжат ава изи Варям курчак гаяк чикта, шымата, туныкта. Таклан огыл ойлат вет: «Уш ава шӧр дене пура». Варя марлат, рушлат мутланаш тырша.
Ӱярня пайремлан аваже Варялан «Сайвер» салонышто лӱмын телым чийыме марий вургемым ыштыктен. Пеш сылнын коеш: мыжер, йымалныже — марий тувыр-шовыр, вуйышто — пеледышан шовыч. Тиде — Варян кокымшо марий чиемже. Тылеч ончыч аваже тудлан кеҥежым чийышашлык вургемым ыштен улмаш. Варя тудын дене Пеледыш пайрем годым ковырататен кертын. Ларисан ойлымыж почеш, тиде ешыште марий йӱлам шуктенак толыт. Кумалтышышкат, марий мероприятийлашкат коштыт. Поснак тоштыеҥым уштымо кечым шот да рат дене эртараш тыршат. Кугезе йӱлам шотлаш, жаплаш нуным вес тӱняш кайыше родо-влакак туныктен, сугыньлен коденыт. Лариса, чынжымак, марий шӱлышан ӱдырамаш, ешыжат тыгаяк. Таклан огыл марий калыкын вес калыкмутшат ойла:«Ава чыла пашалан вуйын шога» але «Ава — сурт эҥертыш». Чынжымак, еш пиал лач ӱдырамаш, Ава деч тӱҥалеш.
С.Носова.
Д.Речкинын фотожо.
