М.Шкетан лӱмеш Марий национальный драме театр шукерте огыл Майоров-Шкетанын «Эреҥер» романже почеш шындыме спектакльым ончыктыш. Эртыше курымысо 20-шо ийласе илышым ончыктышо постановкышто Эвай Пӧтырын аважын рольжым Алёна Мочаловалан ӱшаныме.
Тиде образым келгын почын пуымыж дене актрисе шуко еҥым шортарыш. Героиньын ойлышаш шомакше шуко лийын огыл гынат, ава шке шочшыжым йӧратымыжым, тудын верч ойгырымыжым мут дечын посна мастарын ончыктен моштыш, авторын каласаш шонымыжым ончышо-влаклан намиен шуктыш, шонем.
— Тиде рольым чоҥымо годым Ольга Киевскаян «Баллада о матери» произведенийже гыч тыгай корно-влак ушышкем пурат:
«…Вытирала с губ сыновних кровь…
Вот такой,– убийственно великой,-
Может быть у Матери любовь.»
Тиде почеламут аван образшым чоҥаш моткоч полшен. Чынак, ава шке икшывыже верч чыла пуаш, тудлан кӧра чыла ышташ ямде. Тиде рольышто ава, пӱйым пурын, чыла чыта, — палемда Алёна Мочалова да шинчавӱдшым шылтенрак ӱштылеш. — Роль изи гынат, тушто «йӱштылаш» лиеш.
Марий сылнымут театрыш конден
Советский районысо Шӱдысола ялыште шочын-кушшо Алёна Кельмаксола школышто тунеммыж годым почеламутым лудаш моткоч йӧратен. Тудо тӱрлӧ конкурсыш коштын, олимпиадыште уш-акылым терген. Информатике, марий йылме ден литератур, биологий да икмыняр моло предмет дене районын чапшым республик кӱкшытыштӧ арален.
— Марий йылме ден литературым туныктышо Василий Васильевич Овчинников моткоч пеҥгыдын йодшо лийын. Мыланна туныктышылан тунемаш каяш кӱлмӧ нерген эреак ойлен, — школ пагытышкыже пӧртыльӧ А.Мочалова. — Латикымше классым тунемын пытарымеке, «Марий коммуна» газетыште Москошко Щепкин лӱмеш кӱшыл театр институтыш марий ӱдыр-рвезе-влакым тунемаш погымо нерген уверым ужынна да туныктышо класс гыч икмыняр еҥым шкем терген ончаш колтыш. Йошкар-Олашке кок йолташ ӱдыр пелен мыят толынам. Мемнан гайже моткоч шукын лийыныт: ик верышке куд еҥ манме ушешем кодын. Колыштмашыште почеламутым лудмым сайын шарнем. Адакшым лӱмынак ямдылалтынат омыл, могайым паленам, тугайым ойленам. «Кокымшо турышто вашлиймешке» — шомак шоктыш, но тидат мыйым куандарен огыл. Вет мый Йошкар-Оласе медколледжыш тунемаш пураш чыла документым сдатленам.
Палемдыме кечын Алёна кокымшо турымат сайын эртен да тудым кумшышко ӱжыныт. Кумшымат сайын эртен. Тунемаш пурен кертмыжлан ӱдыр моткоч ӧрын.
— Вет мыйже мурен ом моштыс. Калыкыште манмыла, пылышем маска тошкалын витне, — воштылеш Алена. — А тунам театрыште тыге ойлымым моткоч шарнем: «Театрыште мурен моштыдымо артист лийшаш огыл!»
Сандене тунемме пагытыште ялысе ӱдыр тидын шотышто ятыр ойгырен. Но Москосо вузышто шинчымашым налаш тудлан моткоч келшен. Варажым фортепьяно денат шокташ тунемын. Преподавательже Владимир Багратович Монаховын ойжо тунемаш да артист корныш лекташ кугу ӱшаным шочыктен.
Кумданрак — «Марий Эл» газетын
2017 ий 16 декабрьыште лекше номерыштыже лудын кертыда.
Алевтина БАЙКОВА.
