Ты семӱзгарын семже самырыкланат, илалше-влакланат моткоч келша. Гармонь йӱкым колмеке, кумыл кӱза, йол шкежак тавалташ ӱжеш. «Марий Эл» газет редакцийыштынат гармонистна уло. Кужэ‰ер районын шочшыжо Марий Элын сулло журналистше Вячеслав Смоленцев паша верыштат ятыр вашлиймашым, пайремым сӧрастара. Семӱзгаржым паша коклаштат шокталтен колтымекыже, чонлан куанлын, куштылгын чучын колта.
– Иктаж кудымшо-шымше классыштак ты семӱзгарым шупшкедаш тӱҥалынам. Ачамым ончен, ты мастарлыклан тунемынам, тудо баянымат, аккордеонымат сайын шоктен. Баянжым ялыште ваштареш пошкудо деч налын конден улмаш.
Ончычсо дене таҥастарымаште, кызыт гармоньым шуэнрак кидыш налам. Шарнем, самырыкем годым чо-отак шоктенна. Уремыште гармонь семым лукмеке, йырваш шукын погынат ыле. А мемнан Кораксола ӱдырнаже-влак могай сылнын муреныт!? Кызыт, очыни, самырык-влак тыге огыт керт. Раисия Шучинан, Зинаида Алексееван, Лидия Мамаеван талын мурымышт кызытат пылышемлан солна. Чаманаш кодеш, нунын кокла гыч Зинан ӱмыржӧ кӱчык лийын.
Шуко сӱаныште лийынам. Шкенан кундемыште веле огыл, пошкудо районлашкат лектын коштынам. Телыже, кеҥежше, манме гай, сӱаныш шокташ ӱжыт гын, торешланен омыл. Тыгай пайремыште кок гармонист лият гын, сайрак, шкетын кечыгут пеш ноялтеш да кид пеҥаш тӱҥалеш.
А.БАЙКОВА
