13 августышто Я.Эшпай лӱмеш Марий кугыжаныш филармонийын у зданийже почылтеш
Маргосфилармонийын зданийжым 2014 ийыште чоҥаш тӱҥалме, но окса чӱдылан кӧра пашам жаплан чарыме. Марий Элым вуйлатыше Александр Евстифеев Федераций Советыште, республиклан 100 ий теммым пайремлаш ямдылалтме оргкомитетын заседанийлаштыже ик гана веле огыл тиде йодышым нӧлталын. Тыге «Культура» нацпроект кӱшеш филармоний Изи Какшан сереш верланыше у зданийын омсажым почеш. Реноваций йӧн дене республикылан 650 миллион теҥге ойыралтын.
Филармонийын у оралтыжым почмо деч ончыч Марий Элым вуйлатыше Александр Евстифеев концерт да репетиций зал-влакым, моло пӧлемлам ончен лектын. Артист-влак дене мутым вашталтымыж годым тудо каласен:
– Кандаш лу ий филармоний «квартирант» семын тӱрлӧ вере «илен» толашен, ынде ожнысым мондаш лиеш, шонем. Чыла – мо таче ышталтеш да кугарнян филармонийым официально почмо годым лиеш – кумылдам нӧлтышаш, пашам ышташ да вияҥаш полшышаш. Тыланда сеҥымаш-влакым тыланем», – сугыньлен Александр Евстифеев усталык коллектив-шамычлан.
Артист-влак Марий Эл вуйлатышылан тауштен ойленыт. «Ончычсо паша верна дене нигузеат таҥастараш огеш лий. Шкенан зална уло – тиде моткоч сай. Оралте эҥер серыште, моткоч сӧрал верыште шинча. Ынде мемнан пеш йӧнан гримёркына, репетицийым эртараш чапле зална-влак улыт. У зданийыш пурымо годым омсалондемым вончет веле, шулдыраҥме гай лият», – куаныштым шылтен кертын огытыл артист-влак.
Марий Эл вуйлатыше палемден, тыште 5 профессионал коллектив тырша. Нуно, нимогай йӧсылыкым ончыде, усталык поянлыкыштым арален да ешарен толыт.
«Театр тиде яра пырдыж веле огыл, мутат уке сай сцене, акустике, гардероб да молат лийшаш улыт. Тӱҥжӧ – тыглай репертуар дене огыл, а ончышо калыклан келшыше репертуар дене пашам ыштыше коллектив кӱлеш. Филармонийыште таче мемнан тыгай коллектив-влак улыт. Нуно тыршат, репетицийым эртарат. Эн ондак, кугурак тукым гыч виян, уста артист-влак улыт, нуно молодёжьым шке йырышт поген, кузе пашам ышташ, тидын годым кажныжлан шке усталык ойыртемжым арален кодаш – ончыктен кертыт. Марий Элыште сымыктыш пашаеҥ-влакын усталык ойыртемышт улмо шотышто нигӧат ок кокытелане. Ушештарынем, ик ий ончыч Российыште Театр идалык мучашлалте, тунам шотлен лукмо почеш, театр тӧнежлашке коштмо дене, кажне тӱжем еҥлан шотлымаште, Марий Эл Россий Федерацийыште кумшо верыште шога. Мыланна тидыже теве мом ончыкта: тыгай сҥымашым арален кодаш манын, ик верыште тошкыштман огыл, а писын куржман. Усталык куржталмашын верже – филармонийын у оралтыже», – мучашлен каласен Александр Евстифеев.
Л.СЕМЕНОВА ямдылен
Я.Эшпай лӱмеш Марий кугыжаныш филармонийын коллективше-влак:
— «Марий Эл» кугыжаныш куштышо ансамбль,
— А.Искандаров лӱмеш кугыжаныш капелле,
— П. Тойдемар лӱмеш муро театр,
— «Марий кундем» калык семӱзгар ансамбль,
— «Эреҥер» калык муро ансамбль.
Марий кугыжаныш филаромнийын сӧрал оралте йӧратыме Йошкар-Оланан 437 ияш шочмо кечыжлан чапле пӧлек лие.
