Ик мероприятийыште кидмастар ӱдырамаш-шамыч дене палдарыме годым тудын нерген тыге каласышт: «А тиде – Надежда Михайлова. Тудо – автобус водитель». Тыге манме чотак ӧрыктарыш, сандене палыме лияш кумыл лекте. Адакшым, Надям ончен, тудо водитель манын, йӧршынат от шоналте. А кунам шкеж дене мутланет, эшеат ӧрмалгет, вет ӱдырамаш шыман да ласкан гына кутыра, койыш-шоктышыжат моткочак тыматле. Тугеже молан тудо ты пашам ойырен налын? Тиде изи годсо шонымашыжак лийын мо? Лӱдын огыл? Чыла тиде да моло нерген Надежда дене вашлийын мутланышна.
