Шорык
Тиде арня куанле событий-влак дене шарналт кодеш. Тыланда лач мом ыштышашым палемдыман да «шымше шижмашлан» ӱшаныман. Лишыл еҥ-влаклан утларак тӱткышым ойырыза, нунын нерген азапланыза. Тыге вурседылмаш деч утледа.
Презе
Нине кечылаште у пашам тӱҥалын кертыда. Еш да йолташ-шамыч дене мутланымаш кумылдам нӧлталеш. Ӱдыр, ӱдырамаш-влакым у шӱмбел дене палыме лиймаш, романтике шӱлышан вашлиймаш, сюрприз вучат. Рвезе ден пӧръеҥ-шамычынат личный илышыштышт вашталтыш лиеш.
Йыгыр
Тыланда тиде арням шийвундым ыштен налаш кучылтман. Шӱдыр-влак оксам иктаж-кушко пышташ темлат. Тыге шагал огыл парышым налыда. Тиде, мутлан, кугу пого але автомобиль отрасль лийын кертыт. Лишыл еҥ-шамычлан полшеда гын, кылда саемеш.
Рак
Арнян икымше пелыштыже тыланда сай койыш-шоктышым ончыкташ тыршыман, шкем кидыште кучыман, ласка лийман. Тидым шотыш огыда нал гын, тушман-влак вашлиялтын да шонымыдам илышыш пуртымаште чаракым ыштен кертыт.
Лев
Нине кечылаште у еҥ-влак дене палыме лийыда, вучыдымын иктаж-кушко каяш тарванеда, тыгак деловой темлымаш-влакат йоҥгат. Нимо деч тореш ида лий. Тыге те шканда шагал огыл пайдам налыда. Карьер тошкалтыш дене кӱзаш йӧн лектеш.
Ӱдыр
Тиде арнян путырак чулым да чолга лийыда. Оксам тидым я тудым налаш кучылтыда гынат, тудын шагалеммыже чотшак огеш шижалт. Арнян кокымшо пелыштыже шукырак жапым тазалыкым пеҥгыдемдымылан, лишыл еҥ-влаклан ойырыман.
Виса
Шӱдыр-влак тиде арнян ешлан утларак тӱткышым ойыраш кӱлмӧ нерген ойлат. Тыланда кӧра ала-могай азап лийын гын, тудым шкандак кораҥдыман, пелашын вачӱмбакше «сакыман» огыл, уке гын коктын вурседылмаш марте шуын кертыда.
Скорпион
Кеч-могай нелылык лектеш гынат, тудым кызыт куштылгын сеҥеда. Йӧратыме еҥда дене локтылалташ тӱҥалше вашкылымат саемдаш йӧным муыда. Шукырак жапым коктын эртараш тыршыза. Арня мучаште ала-кушко миен толмо пайдам конда.
Пикшызе
Нине кечылаште лишыл еҥда-влак дене каныш шотышто шонымашда ойыртемалташ тӱҥалеш. Вучыдымо роскот лийын кертеш. Кугурак пашам йолташ але коллеге-влак дене пырля ышташ тыршыза. Ӱдырамаш-шамычлан весе-влаклан полшашышт логалеш.
Ирказа
Шӱмбелда дене шукерте огыл веле палыме лийында гын, тудлан чыла каласкалаш да тӱрыснек ӱшанаш огеш темлалт. Ала тудо тендан дене пайдаланаш веле шона, кӧ пала? Тидлан верчын ончыкыжым кумылда чот волен кертеш.
Вӱд йоктарыше
Арня тӱҥалтыште тӱрлӧ событий шагал огыл лиеш. Нелылык ынже лек манын, мом ойлымым да ышташ сӧрымым эскерыман. Шкем ласкан кучыман. Кугыжаныш организацийлашке йодмаш дене мийыме деч вара лектыш вашке лиеш.
Кол
Тыланда шӱдыр-влак поро пашам утларак ышташ темлат. Тӱрлӧ авантюрыш ушныман огыл. Тӱҥалме сомылым мучаш марте шуктыман. Пӧръеҥ-шамыч кызыт илышыштышт чыла-чыла вашталтен кертыт. Улан тунемаш келшыше жап.
Ӱпым пӱчкаш тарваненда гын
5 февраль. Таче ӱп дене нимомат ыштыман огыл, молан манаш гын, пӱчмеке, тазалык дене нелылык лектын кертеш. Чиялтымылан кӧра вурседылмаш тарваныме лӱдыкшӧ уло.
6 февраль. Ӱпым пӱчмӧ депрессий марте шуктен кертеш. Чонышто ласкалык лийже манын, ӱпым натуральный гай тӱсыш гына чиялтыман.
7 февраль. Тиде кечын ӱпым пӱчмӧ деч вара чонда лыплана. Ӱпым молгунамсе деч ойыртемалтше тӱсыш чиялтеда гын, тазалыкда пеҥгыдемеш, оксада ешаралтеш.
8 февраль. Ӱпым пӱчкыда гын, еҥ-влаклан утларак келшаш тӱҥалыда. Ӱпым чиялташ огеш темлалт.
9 февраль. Ӱпым пӱчкашат, чиялташат сай кече огыл, уке гын вий-куатдам йомдарен кертыда, окса шотышто нелылык лектеш. Окса чӱдылыкым сеҥаш ӱп тӱсым оттеночный бальзам але шоҥ дене вашталтыме полшен кертеш.
10 февраль. Таче парикмахерскийыш каяш огеш темлалт.
11 февраль. У прическым ыштеда гын, роскотыш пуреда. Ӱп тӱсым натуральный чия дене вашталтеда гын, тиде карьер тошкалтыш дене кӱзаш полша.
Л.Камалетдинова
Авторын фотожо