саламлымаш

У ий салам: ВОЛЖСКИЙ

Кунам иктаж-мом шонен пыштет да ыштет, кушко-гынат миен шуат. Тӱҥжӧ – лӱдмӧ ок кӱл. Меат ончыч ик аптекым , вара весым, кумшым… почна, тыгак сетьым ыштышна. Но аптекылам почын, вучен гына шинчаш тӱҥалат гын, петырналташат шуко огыл. Эре эскерыман, жап дене тӧр шуаш тыршыман, шуко палыман. Тенийсе гай эпидемий условийыште – поснак.

Аптекыш толшо шукемын, черле ешаралтын. Нунылан эм денат, ой-каҥаш денат полшашак тыршена. Но эпидемийым сеҥаш куштылго огыл. Вес ийыштат тудо шуйна, маныт. Сандене ончыкыжат мемнам кугу паша вуча. Келшыше эмым вашкерак шонен луктыт гын, сайрак ыле, а кызытеш мо улшо дене серлагаш перна.

Эпидемий жапыште калыклан ушештарыме шуэш: тазалыкдам аралыза, еҥ коклаште лиймыда годым маске ден перчаткым чийыза, антисептикым кучылтса, киддам чӱчкыдынрак мушса. Шарныза: тазалык нимо деч шерге. Сандене шушаш У ий дене саламлыме дене пырляк чылаландат таза лияш тыланем. Тазалык лиеш – чыла лиеш. Перегыза шкендам. Илышда пиалан да улан лийже!

Т.А.Гатиятуллина,

Волжскышто «Йӧратыме аптеке» сетьым вуйлатыше, индивидуальный предприниматель

Опубликовать в Одноклассники

Добавить комментарий