Марий Элыште Вашкеполышын единый диспетчер службыжым ыштат.
Специалист-шамычын палемдымышт почеш, тиде йӧн вашкеполышым пуышо бригадым кӱлешан верыш мыняре кӱлеш, тунаре чумырен кертеш. Кызытеш тидым ышташ огеш лий гаяк.
Единый службышто кажныжым посна муниципальный образованийлан пеҥгыдемдыме индеш диспетчер сутка мучко пашам ышташ тӱҥалеш. Тыгодым «вашкеполыш» машинан верланымыжым навигационный оборудований полшымо дене кызытсе жапыште ужаш йӧн лиеш. Тидыже службыш йыҥгыртыше еҥ деке лишкырак улшо бригадым каласыме адрес дене колташ да черлылан лийме семын писынрак полшаш йӧным ышта.
Лишыл жапыште тыгак Йошкар-Оласе вашкеполыш станций у зданийыш кусна, а документоборот – электрон форматыш. Ушештарена, Вашкеполыш станцийын оралтыжым капитально олмыкташ Россий президентын резерв фондшо гыч 56 миллион теҥгем ойырымо. Чыла пашам шыже тӱҥалтыш марте мучашлаш палемдыме.
А 2019 ийыште Вашкеполышын единый диспетчер службышкыжо районласе рӱдӧ эмлымвер-влакын вашкеполышым пуымо чыла отделенийыштым ушат.
М.ИВАНОВА.
