А тый «РУВИКИ»-м палет?

Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов «Рувики» россий  интернет-энциклопедийын проектшылан полышым пуымо шотышто совещанийым эртарен.

Таче тиде онлайн-энциклопедийым Российысе калык-влакын 20 утла йылмышт дене лудаш лиеш, кажне тылзын тудын дене 6 миллион утла еҥ пайдалана. Ик эн кумдан шарлышылан марий, башкир, татар, якут да чечен йылмыла дене лончо-влак шотлалтыт. Тидын деч посна энциклопедийым тунеммаште кумдан кучылтыт: платформышто школыш коштшо-влаклан лӱмынак портал уло, тудо ОГЭ ден ЕГЭ-лан ямдылалташ полша.

Константин Иванов ушештарен, 2024 ий октябрьыште Йошкар-Олаште «Рувикин» выездной редакцийже тыршен, 2025 ий февральыште Марий кугыжаныш университет интернет-энциклопедий дене вашкылым кучымо шотышто ойпидышым ыштен. Тудын палемдымыж почеш, марий йылмым арален вияҥдаш, тыгак Марий Элнам чапландараш интернет-энциклопедийын платформыжым республикна да тудын кумдан палыме еҥже-влак нерген материал-шамыч дене пойдарен толаш кӱлеш.

Тӱвыра, савыктыш да калык-влакын пашашт шотышто министерствын пресс-службыжын увертарымыж почеш, совещанийыште Марий Эл правительстве председательын алмаштышыже «Рувики»-ште кундемналан пӧлеклалтше лончым пойдарыме  шотышто мероприятий-влак планым ямдылаш кӱштен.  Статья-влакым ямдылаш, нуным редактироватлаш туныкташ школ ден вузлаше туныктышо, студент-влаклан семинарлам эртараш темлымаш лийын. Тыгак республикнан тӱвыраже да историйже дене кылдалтше вер нерген эн сай статьялан конкурсым увертараш палемдыме.

Г.Кожевникова

Фотом Марий Эл Тӱвыра, савыктыш да калык-влакын пашашт шотышто министерствын пресс-службыж гыч налме