Оршанке районыш мийымыж годым Марий Эл вуйлатыше Юрий Зайцев тулык да ача-аван полышышт деч посна кодшо икшыве-влаклан пуышаш пачер-влак верланыме пӧртын кузе чоҥалтмыжым ончен лектын. Пӧртым тений идалык мучаште ыштен шуктышаш улыт.
Республик вуйлатыше чоҥымо качествылан да паша графикым шуктымылан тӱткышым ойырен. Подрядный организацийын еҥже ойлен: пӧртым палемдыме жапыште чоҥен шуктат.
Регион вуйлатыше «Лӱдыкшыдымӧ сай качестван корно» нацпроект дене келшышын тӧрлатыме Анисково – Нужавлак – Изи Кугланур автомобиль корным ончен савырнен. Тиде корно Оршанке районысо илемлам райрӱдӧ дене уша. Тудын денак школ автобус ден автобус маршрут-влак кудалыштыт.
Тыште паша графикым ончылтен шукталтын. Ачалыме кумдыкын кужытшо 13 километрат 400 метрыш шуын.
Марий Эл вуйлатышын пресс-службыжын уверже негызеш Л.Камалетдинова ямдылен
