Агроробот, агродрон…

Марий Элыште Россий кӱкшытан «Профессионал-влак» чемпионатын регионысо этапше умбакыже шуйна.

Палашлан, тенийысе таҥасымашыш пуртымо икмыняр у компетенций-влак кокла гыч иктыже – «Агробот-влак (Агроробот-влак)». Тудын дене площадкым Юл кундем кугыжаныш технологий университетын Йошкар-Оласе аграрный колледжыштыже почмо.

Агроробот-влак – ялозанлык пашаште кучылташ робот-шамыч. Тыгай инноваций аграрный процессым у кӱкшытыш нӧлталеш, молан манаш гын роботизироватлыме агрегат-влак пасу пашам палынак куштылемдат. Но агробот дене пашам ышташ айдемын кӱлеш моштымашыже лийшаш. Мутлан, тиде паша заданий дене келшышын программирований йылмыла дене кодироватлымаш; мехатрон устройство ден системе агрегат-шамычым погымаш да варажым тудын дене пайдаланымаш да молат.

Чемпионатын икымше кечынже «Агробот-влак» площадкыште конкурсант-влаклан тыгай заданий лийын: пасум курал-ӱдаш ямдылаш; тушто ялозанлык кушкыл сай лектышан лийже манын, пашам ыштыме планым ямдылаш; агродроным погаш (тыгодым тудо пашалан ямде лийшаш).

Г.Кожевникова

Фотом Йошкар-Оласе аграрный колледжын соцкылысе лаштыкше гыч налме