Чыла ӱдырамаш кужу жап мотор да самырык лийнеже. Но моторлык эн ончычак чон ласкалык да тазалык – гормон фон – дене кылдалтын. Ӱдырамаш гормонын ик тӱшкаже «эстроген» маналтеш. Тудо пӧръеҥ организмыштат уло, но палынак шагал, садланак айдеме тукымын тиде ужашыже моторлыкшо дене утыжым моктанен огеш керт.
Эстрогенын организмыште ситыдымыже ӱдырамашын чӱчкыдын але эре гаяк депрессийыште улмыжо, кумылжо кенета вашталтме, нелытше ешаралтме, вӱржӧ кышкалалтме, писын нойымыжо, шкем ӱлыкшын аклымыже, тӱжвал тӱсым эскерыдымыже, йӧратен малаш кумылжо иземме дене палдырна. Эстрогеным эше самырыклык гормон маныт. Ӱдырамаш шкенжым ӱдырамаш да мотор улмыжым шижеш гын, ийгот нимогай рольым огеш мод.
Эстрогеным чолгаҥдыше кум тӱрлӧ кушкыл гормон: изофлавоноид, лигнан да куместан – уло. Нуным кочкышыштат муаш лиеш. Ты шотышто 1-ше №-ан продуктлан йытын нӧшмӧ шотлалтеш. Тушто ӱдырамашын тазалыкшылан пайдале моло веществат шуко, нуно онкологий чер деч аралат, организмым эрыктат, эрыкан радикал-влаклан кӧра организмыште вияҥше шопымо процесс ваштареш кучедалыт. Йытын нӧшмым йоҥыштен да шушыл семын вӱд дене пырля йӱыт. Тудым тыгак пучымышыш ешарат але мӱй дене варен кочкыт. Эмлалтме эн кугу дозо – кечыште 2 кугу совла.
Кушкыл гормон кунжут да кечшудо нӧшмыштӧ, ужар пурсаште, немычпурсаште, нутышто. ясмыкпурсаште ситышын. Мутлан, ясмыкпурсаште белок шуко, тыгак серотониныш савырныше да депрессий деч утлаш полшышо триптофан уло.
Шымлымаш рашемден, кечыште 500 мл марте кофем йӱшӧ ӱдырамаш-влакын организмыштышт эстроген 70 процентлан шукырак лийын кертеш. Тидыже нунылан мӱшкырын ӱлыл ужашышт да эрдышт гыч уто нелытым кудалташ чаракым ышта.
Чыла фрукт кокла гыч абрикосышто эн шуко лигнан. Тиде саскам свежанекат, коштенат кочкаш пайдале.
Эстроген тыгак соҥгыранужышто (шалфейыште), умлаште, женьшень да солодко вожышто, арникыште, висвисыште, писте пеледышыште шуко.
Кушкыл эмла
Йытын нӧшмӧ, изюм, чернослив…
Шоло шӱкаҥын гын, организмлан илаш моткоч неле. Тыгай шотан ситыдымаш деч пайдале напиткым темлат.
Блендерышке 400 мл кефирым темыман, тышкак 2 кугу совла йытын нӧшмым, 1 кормыж але 7 курагам, 7 черносливым ешарыман да сайын гына тыгыдемден лугыман.
Напиткым кастене малаш вочмо деч 2 шагат ончыч да эрдене кочмо деч 1 шагат ончыч 1 стакан дене йӱман.
Ковышта, чылажымат тый кертат
Тиде пакчасаска сусырым иландараш, вӱрым малташ, лу ден пӱйым пеҥгыдемдаш, мокшын пашажым шотыш кондаш полша. Поснак С витаминлан поян ош вуян ковышта пайдале, сандене тудым телым витаминан средстве семын кугыеҥ-влакланат, йоча-шамычланат ситышынак кочкаш темлалтеш. Ош вуян ковыштам диабетик-шамычат рационышкышт пуртен кертыт, молан манаш гын тушто крахмал ден сахарозо палынак шагал.
Рывыжвоҥгым коштен шапашле!
Тудо уто нелытым погымо, тӱрлӧ паразит авалтыме деч полша, мокшым сайын эрыкта.
1 кугу совла коштымо да порошок гай лиймеш тыгыдемдыме рывыжвоҥгыш 200 мл ош аракам темыман да 10 кече шинчыктыман, йоҥгытым кече еда рӱзалтыман. Шӱрыман огыл, йӱмӧ деч ончыч лугыман да йошкынге подылман.
Паразит авалтыме годым рывыжвоҥго настойкым 20 кече жапыште кажне кастене 2 изи совла дене подылман, мокш да пагарйымал ту чер деч – 3-4 тылзыште кас еда 1 изи совла дене, гепатит деч – 4 тылзе эрдене да кастене 1 изи совла дене, мокшым эрыкташ кӱлмӧ годым – 15 кече жапыште кажне кастене 2 изи совла дене.
М.ИВАНОВА ямдылен
М.Иванован фотожо/ «Марий Эл» увер агентстве
ТЕМЛЫМЕ ЙӦН ДЕНЕ ПАЙДАЛАНЫМЕ ДЕЧ ОНЧЫЧ ВРАЧ ДЕНЕ КАҤАШЫЗА!
