Кодшо рушарнян Марий паркын сылне пӱртӱс лоҥгаштыже кече мучко шӱвылвӱдым лукшо тугай тамле ӱпш шоген! Тушто «Йошка еш» кокымшо гастрономический фестиваль эртен. Марий Эл гыч веле огыл, Юл кундем гыч чылаже 20 наре участник тушко ушнен. Кажныже тамле кочкышым ыштен, калыклан темлыме пашам шуктат.
Марий паркын тӱҥ сценыже йыр келыштарыме аланыш нуно рат дене вераҥыныт да туштак, ты але вес кочкышым шолтен, кӱктен темленыт. Мутлан, «Теплая речка» трактирын шеф-поварже Иван Антропов кугу подеш тутло солянкым шолтен, шылым кӱктен. Шылже чодыраште илыше ир янлык гыч лийын. Оршанке район гыч «Море Лаптевых» аквафермын еҥже-влак осетровый урлык кол гыч тӱрлӧ чес дене сийленыт. Курыкмарий вел гыч «Травник» павильонышто могай гына шудым, олма гыч пастилам, пӱгыльмӧ гыч вареньым, шудо чайым темлен огытыл! Чылаже каласен кодашат неле: тӱрлӧ кӧргашан мелнам, садыште ончен куштымо, чодыра ден олыкышто погымо эм кушкылым, приправым, емыж гыч сатум, кондитерский лачка чесым авызлаш йӧн лийын.
Фестивальыште кок тӱрлӧ коҥгам: одо ден марийым ужаш лийын. Уремыштак нуным олтеныт. Салмавондо дене пайдаланен, удмурт-влак тушто тӱрлӧ кӧргашан шкеныштын калык кочкышыштым – перепечым, а марий-влак – команмелнам – кӱэштыныт. Кок кочкышыжат пеш тамле да ойыртемалтше. Налаш кумыланжат черетыште шукын лийыныт.
Фестивальын организаторжо-влак мероприятийым эртараш сайын ямдылалтыныт. Мутлан, кажне участникын павильонжо пелен чесым налын кочкаш моткоч ойыртемалтше изирак ӱстел-влакым келыштареныт. Тудыжым тыглай кӱртньӧ печке да йыргешке оҥа гыч келыштареныт. Тӱжвачын тудо чынжымак барный ӱстел гай койын. Пайремыш толшо-влаклан сценыште мо ышталтмым ончен шинчашат сай йӧным муыныт. Олымбал-влакым тыглай поддон гыч келыштареныт. Тушко пушкыдо ужар шартышым гына шареныт. А шичмеке, туге чучын, пуйто ужар олыкышто шинчет. Тыгак пушкыдо мешак-пӱкенат ситыше лийын.
Фестивальым торжественно почмаште Йошкар-Олан мэржын пашажым жаплан шуктышо Антон Трудинов, республикын спорт да туризм министрже Лидия Батюкова лийыныт. «Российын гастрономий картше» проект вуйлатыше Екатерина Шаповаловат лӱмын толын. Тудын ойлымыж почеш, ты фестивальым тудо лач ты проектыш пурташ шона. Тудын гоч Екатерина мемнан регионысо калык кочкыш-влак нерген Российысе утларак калыкым палдараш шона. Тиде амал денак «Йошка еш» фестивальыш веле огыл, Йошкар-Олан 440 ияш лӱмгечыжым палемдымашке Куба, Венесуэла, Армений, Вьетнам, Белоруссий, Турций, Казахстан да моло эл гыч унам, мер калыкын шонымашыжым луктын ойлышо, блогер, журналист-влакым ӱжыныт. «Межэтнический журналистике гильдийын» тӱрлӧ кундем гыч толшо журналистше-шамычат мероприятийыште лийыныт.
Фестиваль деч ончыч мероприятий годым эртарыме тӱрлӧ мастер-классыш логалшашлан билетымат модыныт. Туныктенытше ышташ ӱячам, команмелнам, перепечым, мӱйгиндым, чуваш колбасам. Оласе ятыр усталык коллектив, спорт клуб кочкыш пайремым сӧрастараш полшен.
Чыла тиде кечывалым лийын. А кастене, Патриарший площадьыште олан кечыжым палемдыме годым, фестивальым иктешленыт. Тыге «Идалыкын открытийже» номинацийыште Оршанке районысо «Море Лаптевых» акваферме ойыртемалтын. «Мари» ресторан «Марий Элысе эн сай йӱла-влак кокласе кухньо» семын палемдалтын. Эн сай презентаций «ЭКО агро» фирмын лийын. А теве Удмуртий гыч толшо «Перпечкин» предприятий «Фестивльын эн сай концепцийже» номинацийыште сеҥен. Куркымарий гыч «Травник» фирмын шудо чайже «Фестивльын эн сай шокшо йӱышыжӧ» семын аклалтын. «Гастрономический туризм объект» номинацийыште «Теплая речка» трактир ойыртемалтын. Чылаже 14 участникым тӱрлӧ номинацийыште палемденыт.
Светлана Носова
М.Скобелевын фотожо.
