Пӧръеҥ – Элым аралыше, салтак, сарзе! Вашке нуным пайремышт дене саламлаш тӱҥалына. Тылеч посна пӧръеҥ – ала-кӧн марийже я йӧратыме еҥже, шочшын ачаже. Пелашыже тудым тӱрлӧ семын ойла: лӱмжӧ дене, коклаште ачалӱмжымат каласен колта. «Эй!» манынат, чӱчкыдын кычкыралына. Самырык-влакше котик, зайка, пупсик, лучик, птенчик – манмыла, кӧ кузе мошта. Но марий еҥлан тыге ойлаш келшен ок тол.
Палаш оҥай, а телефонышкыда пӧръеҥдам те кузе возенда? Могай мут дене? Айста ончалына.
Мария КОЖЕВНИКОВА, Моско:
– Пелашемым телефонышто «Йöратымем» манын возенам.
Кунам илыш мундырам тиде айдеме дене кылдалтын, тунамак тыге серенам. Тетла вашталтенат омыл. Ынде 12 ий тыге возымылан.
Кузе возен руш поэт Роберт Рождественский, «Чылажат йöратымаш гыч тÿҥалеш». Тыгак илена.
Татьяна ПОПОВА, «Кугарня» газетын дизайнерже:
– Пелашемын кок телефон номержым кок тӱрлын лӱмденам. Икымше номержым «Йӧратымем» манын, весыжым — «Игорёжик». Кокымшыжым келшаш тӱҥалмына годымак возенам да нигунам вашталтен омыл. Тудын дене ик историй кылдалтын. Икана Игорь вашлиймашыш пондашыжым нӱжыде толын. Пондашыже коваштем шуркален, да «Чылт ёжик гай улат» манынам. Тыге Игорёжик лӱм шочын. Варарак пелашем мылам пушкыдо шоҥшо модышым пӧлеклен. Тудым ончен, кажне гана келшаш тӱҥалме жапнам порын шарналтем.
Екатерина ТЕТЕРИНА, «Ончыко» журналын тӱҥ редакторжын алмаштышыже:
– Пелашем мыйын «Муж» манын возалтын. Молан? Экраныште йыҥгыртышын лӱмжӧ эре волгалтешыс. Вик коеш! Эскерен ончышо, шекланыше-влак мыланем кӧн йыҥгыртымыжым тек палат.
Наталья ЛАВРЕНТЬЕВА-ИВАНОВА, Морко район:
– Пелашемым телефоныштем «Милый» манын лӱмденам. Тиде шомак тӱрыснек тудын койыш-шоктышыжым почын ончыкта. А эше чурийжым шыргыжмаш сӧрастара, кутырымыжо кажне еҥын чоным савыра. Мыйын веле огыл, тек кажне йыҥгыртышын шӱмешыже пижеш.
Алеся ВЛАДИМИРОВА, Марий Эл ГТРК-н корреспондентше:
– Эн ондак пелашемым лӱмжӧ дене возенам. Вара чонлан эре лишылрак да лишылрак лиймыж семын «Йӧратымем» (рушла) мутыш тӧрленам. Ӱшанем тиде юзо мутын вийжылан. Мутлан, сырыме годымат телефонышто ты мутым ужмеке, тиде айдемын чонетлан лишыл улмыжо угыч пенгыдемеш.
Нина АЙВАРОВА, этнопсихолог, Хант-Мансийский округ:
– Мыйын лӱм дене возалтын – «Володя». Ондак 2 симке лийын, сандене тыге ыле: «Володя Х-М» да «Володя Й-О».
Алевтина КАРПОВА, туныктышо:
– Кок номерже уло. Иктыштыже ондакысек – «Пелашем шӱмбелем». А кокымшо номерже паша дене кылдалтын, оксам кушко колтышашым ончыктем. Южо еҥже ойлымо дене гына огеш серлаге, могай номерыш кӧлан колта – шинчаж денак ужшаш. Сандене тушто «Карпов Сергей» манын возенам.
Лариса СИДОРКИНА, мурызо:
– Телефонышкем «Генук» ман возенам. Эн лишыл да шерге айдемым тыге возенам. Нигӧ денат ом путае.
Лидия СЕМЕНОВА йодыштын
