Возенна ыле: таче, 30 август, гыч 1 сентябрь марте рӱдолаштына «И краткая» Йошкар-Оласе икымше кинофестиваль эрта. Шочмын Э.Сапаев лӱмеш Марий кугыжаныш академический опер да балет театрыште тудлан пӧлеклалтше пресс-конференций эртыш.
Тӱҥалтыште Марий Эл правительстве председательын алмаштышыже – республикын тӱвыра, савыктыш да калык-влакын пашашт шотышто министр Константин Иванов, кинофестивальын генеральный продюсерже Денис Шаблий, мероприятийын программный директоржо Ольга Филонова кинофестиваль, тудын программыже, могай фильм-влакым ончыктат, нуным кӧ сниматлен, автор-влак кушеч улмо нерген радамлын каласкалышт. Тылеч вара журналист ден блогер-влакын йодышыштлан вашештышт.
Палдарымышт почеш, программыш Российысе режиссер-влакын кӱчык метражан 10 модыш, 7 документальный да 8 анимаций фильмышт пурталтыныт. Фильмышт дене автор-влак шкешт палдарат. Ончыктымо деч вара каҥашымаш лиеш.
Икымше кинофестиваль 30 августышто Э.Сапаев лӱмеш Марий кугыжаныш академический опер да балет театрыште почылтеш. Мероприятий «красная дорожка» ‒ фестивальын участникше-влакым вашлиймаш да нунын дене палдарымаш – гыч тӱҥалеш.
Участник-влакын пашаштым 31 августышто «Октябрь» кинотеатрыште кечыгут, 10 шагат эр гыч 22 шагат кас марте, ончыктат. Ончылгоч регистрироватлалтме почеш нуным кажныжым яра ончаш йӧн пуалтеш. Фестивальын программыж дене келшышын тыгак чапланыше режиссёр да актёр-влак дене вашлиймаш, мастарлык класс-влак эртат.
Ушештарена, фестивальын жюри председательже кинорежиссёр, Россий искусствын сулло деятельже Андрей Эшпай лиеш. А жюришке режиссёр, сценарист да продюсер Алексей Федорченко, Марий Эл правительстве председательын алмаштышыже – тӱвыра, печать да калык-влакын пашашт шотышто министр Константин Иванов, Россий Федерацийын сулло артисткыже Евдокия Германова, актриса Ирина Темичева, актёр Роман Попов пурталтыныт. Сандене фильм-влакым ончаш, вашлиймашлашке толыда гын, нуным чылаштым ужын да мутымат вашталтен кертыда.
Кинофестивальым торжественно петырымаш 1 сентябрьыште туштак, Э.Сапаев лӱмеш Марий кугыжаныш академический опер да балет театрыште, лиеш.
«И краткая» кинофестиваль Культурный инициативе президент фонд, Марий Эл правительстве, республикын Тӱвыра, савыктыш да калык-влакын пашашт шотышто министерствыжын полшымышт дене эртаралтеш.
Любовь Камалетдинова
Авторын фотожо
