4 ноябрьыште Москосо ВДНХ-аште «Россий» лӱман тӱнямбал кугу ончер-форумышто мемнан кугыжанышын 89 регионжо дене пырля Марий Элат шкенжын сеҥымашыже-влакым ончыкташ тӱҥалеш.
Ты кечынак Марий кундемланна 103 ий темеш. Тудын лӱмеш регионышто шуко пайрем мероприятий лиеш.
Республикын кечыжлан кажне муниципал район ден оласе тӱвыра, тӱвыра да каныме учрежденийлаште, образовательный организацийлаште концерт программе, конкурс ден спорт, модыш мероприятий-влак эртат. Библиотек, тоштер системын учрежденийлаштыже ончер ден экспозиций-влак почылтыт.
Ик эн кугу мероприятийжылан «Марий Эл – виян вер» республиканский калык усталык фестивальын гала-концертшым шотлыман. Чыла районла гыч эн виян коллектив-влак Ленин лӱмеш тӱвыра полатыште шке мастарлыкыштым ончыктат. Концерт 14 шагатлан тӱҥалеш.
Чыла мер пашаеҥ-влакат ӧрдыжеш огыт код. Йӱла почеш куанле кечым палемдаш чыла кумылан-влакым П.П.Глезденев лӱмеш саклымверыш (сквер) 12 шагатат 30 минутлан пагален ӱжыт. Марий кундемын 100 ияш лӱмгечыжлан ыштыме ты арт-объектым «Оласе средам тӱзатымаш» программе кышкарыште чоҥымо.
Волжский районысо Пӧртанур ялыште марий драматург, лӱмлӧ мер да кугыжаныш пашаеҥ, шке жапыштыже Марий АССР Верховный Советын председательже да Марий Эл Кугыжаныш секретарьлан ыштыше Николай Федорович Рыбаковлан шарнымаш кӱм да паркым почыт. Мероприятий 11 шагатлан тӱҥалеш.
Ты кечынак шке жапыштыже Марий автономийым ыштымашке кугу надырым пыштыше, поснак тидын дене кылдалтше документ-влакым ямдылыме пашам шуктышо да нуным Москваште аралыше вес пагалыме еҥын, Сергей Алексеевич Черняковын, Оршанке район Кӱшнур ялыштыже икмыняр ий ончыч почмо Шарнымаш оҥа воктеке 9 шагатлан пеледышым пышташ каят.
А такшым, ты кечын Марий Эл Республикланна шочаш, вияҥаш полшышо, шке надырыштым пыштыше кажне талешкыже-влак деке пеледышым наҥгаяш уто огыл, очыни.
С.Носова
М.Скобелевын фотожо
