Тачысе кечылан Марий Элыште чылаже 156 приходысо храм уло. Тушто 136 священник ден 12 диакон пашам ыштат.
Тений 25 июльышто Йошкар-Оласе епархийлан 30 ий темын. А кумло ий ончыч мемнан кундемыште 33 храм гына лийын да тушто 38 священник ден диакон служиленыт. Тыгак таче Марий кундемыште кок монастырь уло, кумшыжо чоҥалтеш. Воинский частьлаште да исправительный колонийлаштат храм-влак улыт. Чыла тидын нерген марий митрополит Иоанн лӱмгече вашеш журналист-влаклан пресс-конференцийыште ойлен.
Владыка Ежовышто Мироносицкий монастырьым уэмден нӧлтымӧ жапымат шарналтен, тыгак – Йошкар-Олаште кузе Успенский, Серафимовский, Христосын шочмыжлан черке-влакын йол ӱмбаке шогалмышт нергенат. Шукерте огыл Тарханово микрорайонышто «Чыла ойгырышо-влакын куанышт» юмынаван иконыжлан пӧлеклалтше храмым освятитленыт. Туштат прихожан-влак шукын улыт, рушарня школышко 70 наре йоча коштеш. Кугурак ийготанлан школышкыжо 20 еҥ мияш кумылаҥын.
Тачысе неле саманыште, кунам элнам аралаш кӱлеш, кунам ава-ача-шамыч шке йочаштым йомдарат, храм-влак тушко толшо-влакын чоныштым мыняр- гынат лыпландараш полшат. Самырык, икшыве-влак утларак толыт, тиде куандарыде огеш керт. Кумло ий ончыч черкыш коштшо-шамычын кокла ийготышт 55-60 лийын гын, кызыт – 35 ий.
Марий-шамычланат службым марла эртараш тӱҥалме. Санденак Священный Писаният марлаш кусаралтеш.
Лишыл жапыште Богородице-Сергиевский ӱдырамаш монастырьым нӧлтен шукташ шонат. Тыгак Ширяйково микрорайонышто черкым нӧлташ участкым налаш шонымашышт уло. Тушто храм моткоч кӱлеш манын палемден владыка.
Тыгак владыка епархийын 30 ияш лӱмгечыж дене кылдалтше мероприятийла дене палдарен да журналист-влакын ятыр йодышыштлан вашештен. Митрополит Иоанн вашлиймашым 30 ий ончыч Святейший патриарх Алексий II-ын тудлан пуымо каҥашыже дене мучашлен: «Архипастырь семын тый чыланыштым чонышкет пуртышаш улат, лийже кеч президент але тюрьмаште шинчыше пытартыш преступник. Нуно тыланет чыланат икшывет улыт. Нуным йӧратыман, прихотьыштым гына шуктыман огыл, а нунын чон кӧргышт нерген тургыжланыман, ты сулыкан илышыште нунылан йомаш пуыман огыл». Ты каҥаш денак владыка тачат ила да юмылан служитла.
С.Носова
Фотом Йошкар-Ола епархийын сайтше гыч налме.
