Март кыдалне Москосо Национальность-влакын пӧртыштышт Козьмодемьянскыште кажне ийын эртаралтше «Бендериаде» мыскара да койдарчык фестивальын презентацийже лийын.
Тушто «Калык карнавал» проект кышкарыште мемнан элыште эртаралтше кум тыгай кугу мероприятий дене палдареныт. Марий Элысе мероприятийже дене Козмодемьянск Турист-увер рӱдер вуйлатыше Людмила Жирова каласкален. Тений «Бендериаде» 25-ше гана лиеш да республикын 100 ияш лӱмгечыжлан пӧлеклалтеш. Ты турист событий 27 июльышто эртараш палемдалтын. Тудым турист событий реестрышкат пуртымо, санденак ӧрдыж кундемла гычат уна-влак толыт. Лачшымак Москва гыч, молан манаш гын ик турист фирме «Бендериада: Москва-Васюки» турымат лӱмын ыштен.
Мо дене вара пайрем организатор-влак тений кумылым налаш шонат? Эн ончычак карнавал шествийым ончыктыман. Тушто Ильф ден Петровын романышт гыч герой-влакым ужаш йӧн лиеш. Турист-шамычат, ончылгоч ямдылыме костюмым чиен, тушко ушнен кертыт. Кече мучко Козьмодемьянскыште тидын дене кылдалтше тӱрлӧ модыш, конкурс, таҥасымаш, выступлений лийыт. Пайремлан ямдылалтме паша тӱҥалын, палемдат организатор-влак. Молгунамсе семынак лакток пӱкеным ужалыме аукцион оҥай лийшаш. Иктышкыже брилиантым шылтат. А пӱкенжым оксала веле огыл, ты романым сайын палымыланат налын керташ лиеш.
«Калык карнавал» проектын авторжо Ирина Гончарова шкежат кодшо ийын Козьмодемьянскысе пайремыште лийын. Мом ужмымжо тудлан моткоч келшен, санденак тудын дене палдарыме мероприятийым Москваште эртарымашке мемнан представитель-влакым ӱжын.
С.Носова.
