20 сентябрьыште Российыште Чодыра пашаеҥ-влакын профессиональный пайремышт палемдалтеш. Тений тудо официальный кӱкшытыштӧ 41 гана эрта. Пайрем 1977 ийыште РФ-н Чодыра кодексшым пеҥгыдымдыме датылан келыштаралтын. А Марий Элыште ужар поянлыкна республикнан пел кумдыкшым айла. Сандене тыгай поянлыкым аралыше, тудым шукемден толшо, перерабатыватлыше специалист-влак шукын улыт. Марий Элын Пӱртӱс поянлык, экологий да йырым-йырысе средам аралыме министерствыжын специалистше-влак чодыра пашам вораҥдарымылан кугу верым ойырат. Эшежым республикыште чодыра пашам ворандарыме системыжымак аралан кодымо, палемдат ведомствым вуйлатыше-влак. Кеч ты отрасльым вияҥдымаште кызыт утларакшым арендатор-влак тыршат.
Чодыра специалист-влакын профессиональный мастарлыкыштым тергыме конкурсшат кажне ийын эртаралтеш, поро йӱлаш саврынен. Тудым нуно шкештат вучат, вашлияш, паша опыт дене палдараш, ужын мутланаш йӧн лектеш. Кодшо кугарнян тыгай таҥасымаш эртыш. Министерствын эртарыме мероприятийышкыже Юл кундем технологий университет, чодыра отрасльын профсоюз рескомжо, Чодыра дене пайдаланыше ушем ушненыт. Республикысе лесничествыла гыч чылаже 19 команде участвоватлен.
Мом вара нунылан ышташ логалын? Каласен кодыман, конкурс кажне ийын эре ик семын ок эрте. Организатор-влак мом-гынат эре уым шонен муыт, вет чодыра паша тӱрлӧ шӧрынан, кызытсе саманат вашталтышым, уэмдымашым йодеш. Мутлан, тений участник-шамычлан пожарым йӧрташ, чодыра лоҥгаште ориентирым налын мошташ, чепым вашталташ, пушеҥгым йӧрыктен, тӱрлӧ семын тудым пӱчкаш логалын. Ты сферыште ыштыше пашаеҥлан пычал денат лӱйкален моштыман, сандене кажынжлан чоҥештыше мишеньышкат логалташ кӱлын.
Тӱрлӧ этапыште сеҥыше-влакым посна палемденыт. Мутлан, чодыра пожарым йӧртымаште Морко лесничество, чепым вашталтымаште да пушеҥгым пӱчмаште Юл кундем технологический университетын тунемме-опытный лесхозшо, сонарзе мастарлык шотышто Волжский лесничестве икымше верыш лектыныт. Тыгак кокымшо ден кумшо верыш лекше-шамычымат палемденыт. Чыла этапым иктешлымеке, икымше верым тунемме-опытный участкын командыже сенен налын, кокымшым — Советский лесничестве, кумшым — Параньга лесничестве. Ойыртемалтше-шамычлан диплом ден «Husqvarna»
компанийын, «Охотактив» кевытын ойырымо пайдале пӧлекше-влакым кучыктеныт. Мучашлан бензопилам ужалыше компанийын специалистше-влак чодырам йӧрыктымӧ у технологий шотышто мастар-классым эртареныт.
С.НОСОВА
Фотом Марий Элын Пӱртӱс поянлык,экологий
да йырым-йырысе средам аралыме минисерствыжын
соцлаштыкше гыч налме
