«Морко муниципальный район» муниципальный образованийын администрацийжым вуйлатыше С.Григорьевын паша гыч шке кумылын каяш йодмашыжым верысе депутат-влакын погынымашышт 7 августысо решенийже дене шуктен. Район администраций вуйлатышым конкурс почеш ойырен налме да тудын дене контрактым ыштыме кече марте вуйлатышын пашажым тудын икымше алмаштышыже А.Голубков шукташ тӱҥалын.
Ончычсо вуйлатышын «шем кечыже» 16 июльышто лийын да отставкыш лекмешкыже шуйнен. Лач ты кечын Морко-Роҥго-Ургакш корнышто водительын титакшылан кӧра Советскийысе «Акашевский» суркайык фабрикын пашаеҥже-влакым наҥгайыше автобус корно ӧрдыжкӧ каен да йӧрлын. Пиалеш, колышо лийын огыл, но куд пассажир чотак сусырген.
Шуко еҥ логалман азапыште С.Григорьев республикысе правительствын пеҥгыдемдыме, тыгай годым мом ышташ кӱлмӧ шотышто регламентым пудыртен, кӱшнырак шогышо должностян еҥ-влаклан шуко еҥан туткар лийме нерген увертарен огыл, тыгак район вуйлатыше-шамычлан аварий верыш лекташ мерым ыштен огыл. Марий Эл вуйлатышын пашажым жаплан шуктышо А.Евстифеевын темлымыж почеш да районысо депутат-шамычын погынымашыштын решенийже дене келшышын, служебный тергымашым эртарыме жаплан С.Григорьевым шке пашажым шуктымо деч кораҥдыме ыле.
А.АНДРЕЕВ.
