16 февральыште Кужэҥер районысо культур да каныме рӱдерыште эртыше торжественный мероприятийыш сарын ветеранже-влак чумыргеныт. Ты кундем гыч йот мландыште шке порысым шуктышо чыла участникым юбилейный медаль дене наградитленыт.
Самырык тукымым патриотизм шӱлышеш воспитатлыме шотышто кугу пашам эртарымыжлан ветеран-влакын всероссийский мер организацийжын «Боевое братство» верысе пєлкажым вуйлатышыже Сергей Хлыстиклан Марий Эл Кугыжаныш Погынын Почетан грамотыжым кучыктеныт.
***
Советский район гыч Афган сарыште 200 утла самырык еҥ лийын. Нунын кокла гыч иктыже, Г.Пиржанов, интернациональный порысшым шуктышыжла, ӱмыр лугыч лийын.
Районышто «Афганистан ветеран-влакын ушемышт» мер организацийым ыштеныт. Ветеран-шамыч тунемме учрежденийлаште лийыт, ӱдыр-рвезе-влаклан Афган сар нерген, шке службышт, иза-шольо семын боевой келшымышт нерген каласкалат.
Тений тыгай кугу мероприятий (тудыжо «Ме шарнена гын, тугеже илена» маналтын) Советский посёлкысо 3-шо №-ан школышто эртен. Тудо вашлиймаште Афганистаныште воинский долгым шуктышо ветеран-влаклан шарнымашан медальым кучыктеныт.
***
Афган-ветеран-влакын Москваште эртыше парадышкышт Марий Эл гыч 9 еҥ миен.
Палаш оҥай
1942 ий 16 февральыште Зоя Космодемьянскаялан Совет Союз Герой лӱмым пуэныт.
Историеш тудо Кугу Отечественный сарыште кредалше-влак кокла гыч Совет Союзын Геройжо лўмым налше икымше ӱдырамаш семын палемадтын.
15-16 февральыште ынде кумшо ий почела элыштына «Зоя – Герой» всероссийский флешмоб сынан патриотический акций эрта.
Вий-куатыштым тергат
23 февральыште Йошкар-Оласе Сеҥымаш паркыште «Патырлык таҥасымаш» турнир эрта. Участник-влак кок тӱшкалан шелалтыт. Иктыштыже 80 килограмм нелытан марте, а вес тӱшкаште 80 килограмм деч кугурак нелытан-влак коклаште эн патыр еҥым пеҥгыдемдат. Вий-куатым тергаш ӱдырамаш-шамычат ушнен кертыт.
Ӱзгарын нелытше – 60 да 80 килограмм, ӱдырамаш-влаклан – 40 килограмм.
Саламлена
19 февраль – РФ Вооруженный Вийын военный оркестр службыжын кечыже.
Марий Эл гыч фотограф П.Васильевын уныкаже, Антон Алимовым, саламлена. Антон военный оркестрыште шокта.
А.Алимов генерал-лейтенант Валерий Халилов лӱмеш Москвасе Военно-музыкальный училищыште тунемын. Тушто Марий Эл гыч эше кок рвезе (Михаил Януков ден Дмитрий Колесников) лийыныт.
Нуно Сочиште кумшо тӱнямбал военный модмашым почмаштат лийыныт.
Е.Эшкинина.
