Яклака ий туткарыш шукта
Уремыште яклака ийлан кӧра пурен кайыше еҥ эмгана гын, кӧм тидлан мут кучаш тшогалташ лиеш.
М.Морозов
Медведево поселко.
Йодышлан Медведево районысо прокурорын полышкалышыже С.Г.Захарова вашештен:
— Асфальтым ий налмылан кӧра яклешт пурен кайыше еҥ сусырген гын, травмотологий учрежденийыш медицине полышлан кайыман. Травмым налмым пеҥгыдемдыше документлан справке, черлын травмотологийыш лекмекыже амбулаторий карт гыч налме выписке але тудым эмлымверыш госпитализироватлыме выписке шотлалтеш.
Тылеч посна пурен кайымым ужшо свидетель-влакын лӱмыштым, адресыштым (тыгайышт лийыныт гын) возен налаш уто огыл. Тыгак кеч-могай йӧнлан эҥертен (фотосъемко, видеозапись), происшествий лийме иян кумдыкым фиксироватлаш кӱлеш.
Тыгак азап лийме кумдыклан вуйын шогышо озам рашемдыман. Ты кумдыкшо шуко пачашан пӧрт пелен гын, тугеже тудлан виктарыше компаний, ТСЖ але ЖСК мутым кучат. А ты вер тӱшкан пайдаланымылан шотлалтеш гын, тугеже – верысе кучем орган-влак.
Ты кумдыкым обслужитватлыше виктарыше компаний нерген уверым ЖКХ-н кугыжаныш увер системыштыже пален налаш лиеш. Тудым Интернетыште вераҥдыме.
Сусыргымыдам пеҥгыдемдыше чыла доказательствым чумырен, судыш пуымо деч ончыч материальный да моральный эҥгекым шӧраш йодмаш дене титакан лица дене лектын кертыда. Тидын годым сусырым эмлаш кучылтмо роскотым пеҥгыдемдыше чыла докумуент (мутлан, эмым, кочкышым налаш кучылтмо чек да т. м) лийшаш. Титакан еҥ тендан йодмым шукташ тореш лиеш гын, тунам ты шотышто йодмаш дене судыш лектын кертыда.
Пашам ыштен кертдымылан гына
Пашам ыштен кертдыме-влаклан наследствым налме посна правил-влак улыт маныт, тыгак мо?
В.Соколов
Советский район.
Йодышлан Медведево районысо прокурорын кугурак полышкалышыже С.Г.Белова вашештен:
— РФ Граждан кодексыш ты шотышто вашталтышым 2018 ий декабрьыште пуртеныт. Тыге, наследствым кодышо еҥын икшывыже, пелашыже, ачаж ден аваже пашам ыштен кертдыме улыт гын, завещанийыште ончыктымо условийым шотыш налде, закон почеш кажныжлан мыняр ойыралтшаш дольын пелыж деч шагал огыл ужашыжым наследоватлат.
Пенсионер-влак тыгак пашам ыштен кертдымылан шотлалтыт. Тидын годым пенсийыш лекме ийготым кугемдыме гынат, у семын наследствым кодымо радам тошто семынак кодеш, кунам ӱдырамаш-влак пенсийыш 55 ияш, а пӧръеҥ-влак 60 ияш лектыныт.
Тӱлыман огыл
Азалан эмым яра ойырат мо?
А.Савельева
Кужэҥер посёлко.
Йодышлан Медведево районысо прокурорын полышкалышыже С.Г.Захарова вашештен:
— РФ Правительствын «Медицине промышленностьлан вияҥаш кугыжаныш велым полшымо, калыклан да здравоохранений учреждений-влаклан медицине назначениян эм препарат-влакым ситарымашым саемдыме нерген» (30.07.1994 ) пунчалже почеш, врач-влакын рецептышт почеш амбулаторно эмлалтме годым эмлыме средстве-влакым кӧлан яра колтышаш тӱшка да чер категорий списке палемдалтын. Ты перечень почеш 3 ий марте, тыгак шуко шочшан ешыште кушшо 6 ий марте икшыве-влаклан эмым яра ойырат. Льготан рецептым налаш илыме верысе участковый врач деч налман.
С.Носова ямдылен.
