Арален коден кертыт
Ӱмаште кеҥежым телевидений дене кольым: 2022-ше ий 1-ше февраль гыч гражданин шотышто исполнительный производствым почмо гын, йодмашыже почеш суд пристав-исполнитель гражданинлан илен лекташ да йочажым ончаш ситыше роскот кугыт оксам арален коден кертеш. Тиде чынак мо?
Н.Веревкин
Медведево район
Йодышлан юрист, «КонсультантПлюс Марий Эл» ООО-н внештатный экспертше Алексей Инородцев вашештен:
– 2021 ий 29 июньышто «Исполнительный производство нерген» федерал законыш да РФ Гражданский процессуальный кодексышке вашталтышым пуртеныт. Тудо 2022 ий 1 февраль гыч вийым налын. Закон дене келшышын парыман гражданинын РФ-се калыкын илен лекташ кӱлмӧ кугытан пашадарже да моло парышыже (гражданинын илен лекташ кӱлмӧ эн изи оксаже Россий кӱкшытыштӧ налмаште калыкын илен лекташ кӱлмӧ окса кугытшо деч кугурак гын, илен лекташ кӱлмӧ эн шагал оксаже гражданинлан илыме верже Российын могай субъектыште улмым да могай социально-демографический тӱшкалан келшен толмым ончен палемдалтеш) «исполнительный документ почеш оксам кӱрын лукташ лийдыме пого» радамыш пурталтеш.
Физический лица (исполнительный производство почеш парыман гражданин) судебный пристав-исполнительлан кажне тылзын налме пашадар кугытшо гыч илен лекташ кӱлмӧ кугыт оксам арален кодаш манын, йодмашым пуаш праван.
Гражданинын иждивенецше-влак улыт гын, тудо суд гоч кугурак оксамат арален кодаш йодын кертеш. Российыште илен лекташ кӱлмӧ кугытшо кызыт – 13 793 теҥге. Но регионышто тиде окса кугурак гын, гражданин шотыштат арален кодымо окса кугыт тунарак лиеш. Йодмашым чын пуымо гын, пристав исполнитель постановленийыштыже гражданинлан парышыжым арален кодаш кӱлмӧ нерген ончыкта. Банк-шамыч ты постановленийым шотыш налшаш улыт. Но тышке гражданинын алимент але преступленийлан кӧра лийше роскот дене кылдалтше сучай-влак огыт логал.
Кузе тӱлыман?
Мый райрӱдысӧ муниципал учрежденийыште пашам ыштем. Икмыняр ий ончыч еш погымо окса дене Йошкар-Олаште ик пӧлеман пачерым налынна. Илен-толын ӱдыремлан илашыже вер лийже манын шонена. Кызытеш ты пачер яра ынже шого манын, тушко жаплан квартирантым пуртенам. Тудын дечын налме окса дене коммунал роскотым тӧрлена. Налог законодательствым пудырташ огыл манын, пачерым арендыш пуымо окса гыч налогым кузе тӱлыман?
К.Иванов
Морко посёлко.
Йодышлан юрист, «КонсультантПлюс Марий Эл» ООО-н внештатный экспертше» Алексей Инородцев вашештен:
– Пачерыш вес еҥым илаш пуртымо годым налогым тӱлымӧ шотышто икмыняр йӧным кучылташ лиеш. Эн сай йӧн – «Профессиональный доходлан налог». Тыгай налог режимлан эҥертыме годым налогын ставкыже 4% (пачерыш физический лицам пуртет гын) але 6% ( юридический лицам але ИП-м илаш пуртет гын) лиеш.
Налогым тӱлышӧ налог тӱлаш 10 тӱжем теҥге марте пӧртылтен кертеш. Тидын годым налог отчётымат ыштыман огыл. Налогым тӱлымӧ пагытыште парыш лийын огыл гын, налогшымат тӱлаш огеш логал.
«Мой налог» мобильный приложений гоч онлайн йӧн дене профессиональный парышлан налогым тӱлышӧ семын регистрацийым эртен, отчётым ышташ лиеш.
Госслужащий (але муниципал служащий-влак) вес еҥым пачерыш илаш пурташ манын, самозанятый семын регистрироватлалтшаш улыт да тыге ешартыш парышым налын кертыт.
Пачерым физический лица семынат сдаватлаш лиеш, тидын годым парыш деч 13 процентшым тӱлыман. Тыгай годым 30 апрель марте декларацийым ыштыман да тушто арендыш пуымо деч могай окса кугытым налмым ончыктыман. А шке налогшым 15 июль марте тӱлен шуктыман.
Мут кучаш шогалташ лиеш мо?
Шуко пачеран пӧртыштӧ пачерым налынам. Пӧрт шотышто 5 ий гарантий срок эртымеке, ситыдымаш рашемын: коридорышто шикшым шижме датчик ден светильник пешак лишне улыт. Застройщик деч ты экшыкым тӧрлаш але тӧрлымылан роскотым пӧртылташ йодмо. Но застройщик серышыште отказым возен. Санденак рашемдынем: чоҥымо объект шотышто гарантий срок эртымеке, застройщикым экшыкылан мут кучаш шогалташ лиеш мо?
И.Молоканова
Йошкар-Ола.
Йодышлан юрист, «КонсультантПлюс Марий Эл» ООО-н внештатный экспертше» Алексей Инородцев вашештен:
– Закон почеш застройщик чоҥымо объект шотышто гарантий срок эртымекат паша экшыкшылан мутым кучышаш. Чоҥымо годым застройщик пашажым СНиП да вес тӱрлӧ технический нормативный документ почеш шуктышаш. Тыгай нормативный документым пудыртымо факт чоҥымо объект шотышто 5 ий гарантий срок эртымеке лектеш гынат, экшыкым садак застройщикак тӧрлышаш.
Экшыкым тӧрлаш обязанностьым застройщик ӱмбаке суд пыштышаш. Но тидын деч ончыч судыш пуышыжо застройщикын СНиП ден вес тӱрлӧ технический нормативный документлам пудыртымыжлан кӧра экшык лекмыжым доказатлышаш.
С.Носова ямдылен.
