10 ноябрьыште Звенигово олаште олмыктымо да тӱзатыме Юл серым торжественно почыныт. Тиде кугу пашам «Кызытсе жаплан келшыше оласе средам ыштыме эн сай проект-влак» всероссийский конкурсышто сеҥышыш лекше «Юл сер – Звениговын чонжо» проект кышкарыште шуктымо.
– Проектым илышыш пуртымо, чыла пашам мучашлыме: Звениговышто кызытсе жаплан келшыше чапле кумдык шочын. Ӱшаныме шуэш, тыште кажне еҥ йӧратыме лукшым муэш, уэмдыме Юл сер верысе калык дене пырля турист-шамычымат сымыстараш тӱҥалеш да Звениговын визитный картычкыже лиеш, – палемден Марий Эл правительстве председательын алмаштышыже Илга Дравниеце.
Мероприятий годымак локальный сар ден вооруженный конфликтлаште, тыгак Чернобыль аварий деч кодшым кораҥдымаште вуйым пыштыше -влаклан кок памятник-монументым официально почыныт.
Тиде кечын тыгак интерактивный площадке-влак пашам ыштеныт. У сценыште проектым илышыш пурташ полшышо-влакым саламленыт, чапле концертым шынденыт.
М.ИВАНОВА
