3 сентябрьыште Марий национальный конгресс ден Россий сарзе историй обществын Марий Элысе пӧлкаже ваш келшен пашам ыштыме шотышто ойпидышым пеҥгыдемденыт.
Ончыкылык паша лектышым саемдаш виктаралтше документым ыштыме кечыжымат амал деч посна огыл ойырен налыныт. 76 ий ончыч 3 сентябрьыште СССР-ын Верховный Совет Президиумжо Японийым сеҥыме нерген увертарен. Тыге кокымшо Тӱнямбал сар мучашлалтын.
Россий сарзе историй обществын Марий Элысе пӧлкаже 2018 ийыште веле ышталтын гынат, ты пагытыште историй дене кылдалтше, шочмо элым йӧраташ да тудын верч тыршаш кумылаҥдыше ятыр сай паша вораҥын. Икымше тӱнямбал сарыште мемнан кундем гыч кредалше сарзе-влакын лӱмыштым калыкын шарнымашешыже кодаш виктаралтше ятыр шымлымаш эртаралтын. Кажне ийын республикыште Россий кӱкшытан военно-исторический конференций-влакат лиедат.
Обществын Марий Элысе пӧлкажым вуйлатыше Евгений Кузьмин ойпидышым ыштыме годым тыгерак каласыш:
— Марий Элыште тӱрлӧ националностян калык-влак иза-шольо, ака-шӱжар семын келшен илат. Но кажныже шкенжынат историйжым арала да пагала. Вет кажныжын эртыме корныжо – тиде мемнан Россий кугыжанышнан историйжын изи ужашыже. Лач Россий верч мемнан ачана, кочана-шамыч шке вӱрыштым йоктареныт, илышыштым пуэныт. Нунын подвигышт нигунам ок мондалт. А мемнан историйнам шемемдаш, лугаш тӧчышӧ-влаклан Конституций дене келшышын мут кучаш верештеш. Элыштына таче историйын чынжым арален кодаш, патриот-влакым кушташ шуко ышталтеш. Сандене таче, Россий сарзе чап кечын, тиде ойпидышым ыштен, кок ушем дене патриотизм шӱлышан пашам пырля ворандараш кутырен келшен, кугыжанышнан вуйлатышыже Владимир Путин да кугыжанышнан тӱҥ партийже дене пырля чын корно дене кайымынам пеҥгыдемдена.
Марий калык конгресс 20 ий наре шке пашажым ворандара. Тудын радамыштыже шке элым йӧратыше, шочмо калык верч тыршыше, йылмым. йӱлам, тӱвырам арален, вияҥден толшо еҥ-влак шогат. Марий калыкнат шке талешкыже-влакым шарна да шотла, нунын суапыштлан тауштен ила. Марий национальный конгресс вуйлатыше Эдуард Иманаев палемден: «Тӱрлӧ калык дене пырля ваш келшен илаш – кугу пиал. Лач ты ойыртем – элнан тӱҥ поянлыкше. Лӱдыкшӧ сар пуламыр жапыште тушман ваштареш кредалмаште кӧ могай калык гыч улмым ончен огытыл, иза-шольо, лишыл еҥла икте-весе вачылан эҥертен, эрык верч кредалыныт. Ик шонымаш гына лийын – тушманым сеҥаш. Тиде илыш историйым шотыш налын, мыланна кеч-кунамат икте-весылан ӱшанле лийман, ик элыште илен, ик чын корно дене кайыман. Калыкнан икоян улмыжо волгыдо ончыкылыкым пырля чоҥымо пашам куштылемда».
С.Носова
Снимкыште: ойпидышым ыштыме годым – Э.Иманаев да Е.Кузьмин.
