Марий Элыште Калык фронт Йошкар-Олан кучемжым шуктышаш обязательствыжым виктарыше комапний-влак ӱмбаке «кышкымым» чарнаш да кудывечылаште лумым келшен толшын эрыкташ темлен.
Олан мэрийыштыже официально ойлат: кудывечылаште лумым лачшымак виктарыше компаний-влак эрыктышаш улыт. Кеч ятыр кудывечыже администрацийынлан шотлалтеш да муниципальный контракт почеш лумым эрыктыме да шупшыктымо пашам «Город» МУП подведомственный организаций шуктышаш.
Тений 10 январьыште оласе озанлык управлений тиде МУП дене кварталласе да квартал-влак кокласе кумдыкым келшен толшын кучымо шотышто 13 миллион теҥгеаш муниципальный контрактым ыштен. Тиде документыште 13 маршрутым (тушко пурышо чыла кудывечым да тунемме учрежденийла воктенысе кумдыкым) ончыктымо, лумым мыняр жап гыч эрыктыме да шупшыкташ кӱлмым палемдыме. Но чынже дене нине кудывечылаште тиде паша огеш шукталт, да ты амал дене машина-влак луман корнышто пижын толашат. Тыгай нелылыкым сеҥаш полшаш еҥ-шамыч оласе озанлык управленийым йодыт. А туштыжо нуным виктарыше организацийлашке колтат. Кеч ты пашам, каласышна, «Город» МУП шуктышаш.
Лум чот луммо деч вара Мичурин уремысе 38-ше №-ан пӧртыштӧ илыше-влак оласе «шокшо линийыш» икмыняр гана йыҥгырташ тыршеныт, но кертын огытыл. Тунам оласе озанлык управленийыш пӱтыралыныт. Туштыжо ты пашалан виктарыше компаний вуйын шога манын каласеныт. Кеч контракт дене келшышын, тиде – 3-шо №-ан маршрут да кумдыкым «Город» МУП эрыктышаш. Виктарыше компанийыште кӧ чын, кӧ титакан улмым рашемдыде, «вучыза» манын гына каласеныт. Тыге еҥ-шамыч ынде кум арня вучат.
Йыван Кырла уремысе 20-шо, 24-ше да 26-шо №-ан пӧртлаште илыше-влак общественник-шамычлан кудывечыштышт лумым эрыктыдымылан кӧра «вашке полыш» машинан пурен кертдымыж нерген каласеныт. Медпашаеҥ-влаклан черле марте йолын ошкылалышт логалын. Муниципальный контракт почеш тиде кудывече 10-шо №-ан маршрутыш пура, сандене план дене келшышын тудым оласе озанлык эрыктышаш. Но еҥ-влак лумым эрыктыше тракторын нунын дене кунам пашам ыштымыжым эсогыл шарналтен кертын огытыл.
Тыгак Калык фронтын активистше-влак Строитель уремысе 42а №-ан пӧрт кудывечыш ончалыныт. Тушто шукерте огыл лумыш пижше да кудал лекташ тӧчышӧ машинан ораваже йымалне ӱдырамаш колен. Общественник-шамыч палемденыт: тиде кудывечыште корным кызытат эрыктыме огыл. Кеч ты кумдыклан мутым рӱдоласе администраций куча.
– Кудывечылаште лумым эрыктыме шотышто жапын-жапын нелылык лекмым ужына. Оласе озанлык управлений пашаеҥ-шамыч муниципальный кумдык-влакын могайрак улмышт шотышто мониторингым огыт эртаре, виктарыше компаний ден илыме фондым виктарыме моло формын еҥышт дене план дене келшышын паша огеш шукталт. Мыланна увертарат: виктарыше компаний-влакын эрыктыме кудывечылашт мучко «Город» МУП-ын тракторжо-шамыч арам, шӱкыде, кудал эртыме случай-влак чӱчкыдын вашлиялташ тӱҥалыныт. Тидыже ялт кӱлдымаш. Оласе администраций еҥ-шамычын вуйыштым аҥыртылмыштым чарнышаш да ыштыме контракт почеш тыманмеш лумым эрыкташ да шупшыкташ тӱҥалшаш, – палемден Марий Элыште Калык фронтын региональный штабшын сопредседательже Руслан Гизатуллин.
Л.Камалетдинова
