23 февральыште Марий Элым вуйлатыше Юрий Зайцев Шочмо элым аралышын идалыкшым торжественно почын.
Зайцев Самырык-влак полатыште ветеран ден самырык-влак, кучем ден мер организаций-влакын еҥышт иктеш чумыргеныт. Арам огыл лач тиде ийым Россий Федерацийын Президентше Шочмо элым аралышын идалыкше семын увертарен, вет тений Кугу Отечественный сарыште сеҥымылан 80 ий темеш.
Тыштак «Геройын ачаже» фотоончер почылтын. У фотопроект ача ден специальный военный операцийыште вуйыштым пыштыше военнослужащий-эргыштлан пӧлеклалтын. Регион вуйлатыше ончерым ончен лектын да тушко ушнышо-влак дене шомакым вашталтен. Кажне ешын шке историйже. Радион Коротковын эргыже, Станислав Коротков, шочмо элым аралыше-влак радамыш ик эн ончыч ушнен. 2023 ийыште телым тудо сусырген, реабилитаций деч вара передовойыш пӧртылын. 2023 ий 6 июльышто боец сусыргышо-влакым ужатен кайышыжла тушманын БПЛА гыч снарядым кудалтымыжым ужын. «Илыза, пацан-влак!» кычкыралын да, шуко шонкалыде, тудым шке капше дене петырен. Герой «За отвагу» медаль да Мужество орден дене (колымекыже) наградитлалтын.
Шочмо элым аралышын идалыкшым почмыж годым Юрий Зайцев Шочмо элын эрыкше верч кредалше кугурак тукымын подвигшым пагален шарнаш кӱлмым палемден. Тудо элнан пӱрымашыже верч еҥ-влакын ответственностьыштым воспитатлымым кугыжаныш политикын ик тӱҥ направленийже улмымат ушештарен.
Уло эл дене пырля кугыжанышын куатшым вияҥдымашке да пеҥгыдемдымашке республикат изи огыл надырым пышта. Марий Эл гыч военнослужащий, шке кумылын кайыше да мобилизоватлалтше-влак специальный военный операцийыште участвоватлат, элнан суверенитетше ден эрыкшым аралат.
«Шочмо элым аралышын кечынже кызыт боевой постышто улшо-влаклан таум ыштынем: СВО-н участникше, локальный вашшогымашын ветеранже, Россий Вооруженный Вийын да правам аралыше органлан военнослужащийже, рядовой ден запасыште улшо офицер-влаклан – чылаштлан, кӧжӧ эсогыл ты пайрем кечынат шке гражданский да служебный порысшым шукта», – палемден шке выступленийыштыже Юрий Зайцев да награде-влакым кучыктен.
Нунын коклаште – Россий Президентын указше дене подполковник Валерий Чепурной Жуков медаль дене палемдалтын. Воинский порысым шуктымаште чолгалыкым, лӱддымылыкым ончыктымыштлан да шкем чаманыде кучедалмыштлан Александр Богатырев ден Александр Смирнов «Участник специальной военной операции на Украине» медаль дене наградитлалтыныт.
Пайрем лӱмеш Йошкар-Оласе В.П.Никонов площадьыште «Шочмо элым аралыше-влаклан чап» митинг-концерт эртен. Герой-влакым шарналташ да кызыт элнам аралыше-влаклан таум ойлаш шукын погыненыт.
Марий Эл вуйлатыше Юрий Зайцев нуным пайрем дене саламлен да тауштен. Тудо палемден: 23 февраль – тиде тукым-влакым иктыш ушышо да Шочмо элнам кӧ арален, тыгак кызытат арала, нунын подвигыштым ушештарыше пайрем.
Передовойышто улшо да лишыл еҥыштлан полшышо еш-влаклан поснак кугу таумут шоктыш.
«Нуно еҥын эргыже ден марийже верч шкеныштын семынак тургыжланат. Паша денат, поро шомак денат полшат. Чыла тидыже кугу пагалымашым сула», – манын тудо.
Марий Эл вуйлатышын пресс-службыжын уверже негызеш Евгений Садовин ямдылен.
Д.Речкинын фотожо.
