Морко посёлкышто верланыше ийготыш шудымо-влаклан палемдалтше социально-реабилитационный рӱдерын кок воспитательже тӧнежыште илыше йоча-шамычым шке ешышкышт налыныт.
Эше шукерте огыл 15 икшывылан палемдалтше рӱдер йоча йӱк дене шергылтын гын, кызыт тыште – шып-тымык. Республикыштына у коронавирус инфекцийын шарлымыжлан кӧра посна улмо режимым ыштыме да йоча-шамычым дистанционно туныкташ тӱҥалме дене тӧнежыште илыше шуко ӱдыр-рвезым шочмо ешышкышт колтеныт, а пашаеҥ-шамычым — отпускыш. Но кок воспитатель – Наталья Никитина ден Татьяна Михайлова — умбакыже пашам ыштат. Уке-уке, ончычсо семын огыл, а пагытын йодмыж почеш: нуно ача-авашт деке пӧртыл кертдыме икшыве-влакым шке ешышкышт илаш наҥгаеныт.
— Рӱдерыштына илыше ӱдыр-рвезе-влакым мӧҥган-мӧҥгышкышт закон почеш, Морко районысо образований пӧлкан опеке да попечительстве органжын пунчалже негызеш, колтенна, — коронавирусын пандемийжылан кӧра вучыдымын вашталтше илыш нерген рӱдерым вуйлатыше Римма Михайловна Павлова каласкала. – Тӧнежыштына икшыве-шамыч тӱрлӧ еш гыч лийыныт. Ака-шӱжар Зилола ден Азалиям рӱдерышкына социально-лӱдыкшӧ еш гыч конденыт, тидлан кӧра нуным мӧҥгышкышт нигузеат пӧртылтен огына керт. Дошкольник манме ийготан ӱдыр-влакым воспитательна Наталья Вячеславовна ешышкыже ончаш налаш келшыш. Визымше классыште тунемше Коля вес воспитатель Татьяна Александровнан ешыштыже кызытеш 31 май йотке ила, шинчымашым дистанционный йӧн дене налеш. Аваже опеке да попечительстве органын темлымашыжым шукта, чыла сай лиеш гын, рвезым 1 июнь гыч мӧҥгышкыжӧ колтена. Нине кум икшывым норматив дене келшышын ончаш да воспитатлаш кок ешышкат кочкыш продуктым, канцелярский сатум да молым 31 май йотке ситышын пуэнна.
«Зилола ден Азалиялан сай ешын илышыжым тичмашнек ончыкташ тыршена. Ӱдыр-влак кугыеҥ-шамычын кузе мутланымыштым, озанлыкым кучымыштым, сурт сомылкам шуктымыштым ужыт веле огыл, тыгак, пырля шогалын, мом кертмыштым уло кумылын ыштат. Школ деч ончычсо программымат нелылык деч посна эртат. Лишыл еҥем-шамыч Зилола ден Азалиям ешыш икмыняр жаплан налаш кӱлмым умылышт да тидын дене уто мут деч посна келшышт», — палемдыш Наталья Вячеславовна.
Ушештарена, Морко социально-реабилитационный рӱдер – тулык да ача-ава ончымо палемдалтше тӧнеж.
М.ИВАНОВА
