УВЕР ЙОГЫН

Юл кундем федерал округышто: Илыме верым чоҥымо йыр

23 мартыште Юл кундем федерал округышто Россий Президентын полномочный представительже  пелен пашам ыштыше советын заседанийже Нижний Новгородышто эртен.  Тудо «Юл кундем федерал округысо регионлаште илыме верым чоҥымо рынкын вияҥмыже нерген» темылан пӧлеклалтын. 

Заседанийыште М.Бабич деч посна Российын чоҥымаш, илыме да коммунал озанлык министрже М.Мень, Юл кундемысе регион-влакын вуйлатышышт, Россий Федерацийын Федеральный  Погынымашын еҥже-влак лийыныт.

Михаил Бабичын палемдымыж почеш, элыштына  кокла шот дене налмаште  кажне ийын 80 миллион квадрат метр илыме вер чоҥалтеш. Ончыкыжым тиде чот 120 миллион квадрат метр марте шукемшаш. Тидыже ипотеке, льгот программе, мланде, налог, чоҥымо компаний-влак ден кылдалтше йодышым саемдышаш. 

А Юл кундем федерал округышто ӱмаште 15 миллионат 570 тӱжем квадрат метр илыме верым чоҥымо. Тидыже элысе показательын 20 процентше лиеш. Округышто 82 тӱжем чоҥышо предприятий уло. Тушто 530 тӱжем еҥ пашам ышта. Заседанийыште пайыш пурымо чоҥымаш да ипотекылан ставкым иземдыме йодышлан поснак кугу верым ойыреныт. Тыгак М.Бабич аварийнылан шотлалтше пӧртла гыч еҥ-влакым кусарыме проектым округышто 99 процентлан шуктымым палемден.  У илыме верым 180 тӱжем еҥлан пуымо. Тиде программе 2019 ийыштат  шуйна.

Министр М.Мень Юл кундем федерал округышто  илыме верым чонымо йодыш сайын кайымым палемден.  Поснак «Ипотеке да арендыш налме илыме вер»  проектым каҥашымым сайлан шотлен. Тудын подпрограммыжлан  федеральный бюджет гыч 20 миллиард теҥге ойыралтеш, тыгак Российысе субъект-влак шкештат оксам пуат. Юл кундем федерал округлан тиде шийвундо гыч ик нылымше ужашыже логалеш.  Лач тиде полыш дене  тачеш ик миллионат пеле квадрат метр илыме вер чоҥалтын, пӧрт  воктенсе инфраструктур ышталтын. Тидак округышто ик квадрат метрын акшым иземдаш йӧным пуэн.

Л.ШАБДАРОВА ямдылен.

Опубликовать в Одноклассники

Добавить комментарий