УВЕР ЙОГЫН

Ынде чылт поснажак огытыл

Марий Элысе социальный тӧнеж-влак посна улмо режим гыч лектыт.
Республикыштына пытартыш вич социальный тӧнеж посна улмо режимыште лийме деч вара ончычсо паша радамыш пӧртылеш, регионышкына у коронавирус инфекцийым кондымым да шаркалымым шижтарыме шотышто оперативный штабын 15 мартыште эртыше заседанийыштыже увертарен калык илышым вияҥдыме шотышто министр Марина Островская.
Тудын палемдымыж почеш, 11 тылзе ончыч, 2020 ий 15 апрельыште, Марий Элысе социальный тӧнеж-влак элыштына ик эн ончыч пашам петырыме режимыште ышташ кусненыт.
Посна улмо режимыште 12 тӧнеж лийын: «Сосновая роща» ден Карлыган интернат-пӧрт, «Таир», Шоя-Кузнецово, Красный Стекловар, Кундыштӱр, Красногорский, Кожласола да Какшанмучаш психоневрологический интернат-пӧрт-влак, «Солнышко» йоча интернат-пӧрт, ийготыш шудымо-шамычлан Волжск оласе да «Журавушка» социально-реабилитационный рӱдер-влак. Кажне тӧнежыште 14 суткан 6-19 смене эртен. Петырыме режимыш куснышо чыла пашаеҥ черланен кертме шотышто тестым эртен. Пандемий пагытыште самоизоляцийыште 930 пашаеҥ ден социальный услугым налше 2635 еҥ лийыныт.
«Системыште поро шӱм-чонан еҥ-влак пашам ыштат. Нуно, социальный услугым налше-шамычын илышыштым арален кодаш манын, посна улмо режимыш куснымышт годым ешышкышт кок арня пӧртылын огытыл, тыгодым южо еҥ ойыртемалтше условийыште 240 кече утла пашам ыштен. Петырыме режимыште тыршыше чыла 930 еҥ федеральный бюджетын средстваж кӱшеш кумылаҥдыше выплатым налын. Ӱмаште тудын чумыр суммыжо 86,6 млн. теҥгеш шуын. 2020 ий ноябрь гыч выплатым Россий Федерацийын Социальный страхований фондшын регионысо пӧлкаже тӱла», – палемден министр.
Тылеч посна, Марий Элым вуйлатыше Александр Евстифеевын кӱштымыж почеш, ойыртемалтше условийыште тыршыше медицине ден социальный пашаеҥ-влакын 207 йочаштлан «Журавушка» социально-реабилитационный рӱдерыште кандарыме да тазалыкым пеҥгыдемдыме 6 сменым организоватлыме.
«Мере-влакым жапыштыже пуртымылан кӧра черын социальный тӧнежлаштат шарлен кертмыж деч аралалт кодна. Кызыт республикыштына у коронавирус инфекций дене черланыме чот иземын толеш, сандене стационар тӧнеж-шамычым посна улмо режим гыч лукташ лиеш манын шонена», – темлен М.Островская.
Кызыт социальный обслуживанийын организацийлаштыже COVID-19 деч вакцинаций эрта. 15 март йотке прививкым социальный услугым налше 908 еҥ (чумыр чот гыч – 42 процент) да 276 пашаеҥ ыштыктеныт.
Докладым иктешлыме почеш, А.Евстифеев калык илышым вияҥдыме шотышто министрлан ведомствыш пурышо организацийлаште у коронавирус инфекций шарлен кертме деч чыла мероприятийым умбакыжат кӱлынак шукташ да 15 март гыч социальный тӧнеж-шамычын пашаштым инфекционный стационар семын организоватлаш кӱштен.

Марий Эл Республикым вуйлатышын организаций да

аналитике виктемжын уверже негызеш

М.ИВАНОВА ямдылен

Опубликовать в Одноклассники

Добавить комментарий