Мер контроль тӱшкан еҥже-влак Йошкар-Оласе Семёновка селасе 21-ше №-ан школышто лийыныт. Нуно тушто тений 1 сентябрьыште почылтшаш «Кушмо точко» рӱдерын ямде улмыжым тергеныт.
«Тенийысе тунемме ийыште регионысо «Кушмо точко» сеть кумдаҥеш, тыгай формат дене эше икмыняр общеобразовательный организаций пашам ышташ тӱҥалеш. Ме, мер контрольын еҥже-влак, нацпроект ден регионысо программе почеш ышталтше объектлам тергена. Марий Элын ял ден селалаштыже верланыше общеобразовательный организацийлаштыже естественно-научный направлениян тыгай рӱдерым почаш 2023 ийыште 46 миллион теҥгем ойырымо. Роскот изи огыл, но тудо образований сферым вияҥдаш, йочана-влаклан тунемашышт кызытсе жаплан келшыше йӧным ышташ кучылталтеш», – каласен тӱшка мер контрольын енже Алексей Хлопов.
Ушештарена, «Кушмо точко» рӱдерлам ыштыме паша – Марий Элым вуйлатыше Юрий Зайцевын контрольыштыжо. Лач тудын кӱштымашыже почеш регионыштына инфраструктур да моло проектым илышыш пуртымо пашалан мер контрольым вияҥдыме.
Г.Кожевникова
